Holandni ilhomlantirgan yulduz futbolchilar kimlar ekanligi aniqlandi

Manchester Siti hujumchisi Erling Holand o'zining futbolchi sifatida shakllanishida va o'sishida katta ta'sir ko'rsatgan yulduz futbolchilar haqida so'zlab berdi. Bu haqda Zamin.uz xabar berdi.

Norvegiyalik to'purar yoshligida qaysi futbolchilarning o'yinini kuzatganini ochiq aytdi. Holandning so'zlariga ko'ra, u Zlatan Ibragimovichning o'yin uslubidan ilhom olgan va Serxio Agueroning Manchester Siti safidagi harakatlarini diqqat bilan kuzatgan.

Shuningdek, Robin van Persining Arsenal safida ajoyib mavsum o'tkazgani va chap oyoqdagi kuchli zarbalari unga katta taassurot qoldirgan. Bundan tashqari, Lester hujumchisi Jeymi Vardining tezkorligini alohida e'tirof etdi.

Hozirgi kunda Holand o'z o'yinini takomillashtirishda davom etmoqda va maydondagi vazifalariga ham to'xtaldi. Uning ta'kidlashicha, himoyachilar ortiga yugurish va bo'sh hududlar yaratish uning asosiy vazifalaridan biridir.

Bu harakatlar nafaqat uning o'yinini yaxshilaydi, balki jamoadoshi Fil Foden uchun ham qulay imkoniyatlar yaratishga xizmat qiladi. Bu orqali Holand jamoasi uchun muhim rol o'ynashini ko'rsatmoqda.

Manba: One.uz.