Oq Uyda UFC tarixidagi ramziy turnir o'tkaziladi

14 iyun kuni Oq Uyda UFC tarixidagi eng muhim va ramziy turnirlardan biri bo'lib o'tishi kutilmoqda. Bu haqda Zamin.uz xabar berdi.

Bu kechaning qanchalik "portlash" bo'lishi haqida promoushen rahbari Dana Uayt rasmiy ma'lumot berdi va kardni e'lon qildi. Asosiy e'tibor, tabiiyki, asosiy janglarga qaratilgan.

Afishada kuch, nom va intriga mavjud: har bir juftlik o'ziga xos drama, xarakter va "o't" bilan ajralib turadi. Bu turnir oddiy kecha emas, Oq Uy maydonida bo'ladigani uchun UFC uni maksimal darajada shov-shuvli va tomoshabop qilishga harakat qilgani seziladi.

Dana Uayt tomonidan e'lon qilingan juftliklar quyidagicha: Aleks Perreyra va Siril Gan, Iliya Topuriya va Jastin Getji, Shon O'Melli va Ayman Zaxabi, Maurisio Ruffi va Maykl Chendler, Bo Nikal va Kayl Dokas, Diyego Lopes va Stiv Garsiya. Janglar O‘zbekiston vaqti bilan 14 iyun kuni soat 06:00 da boshlanishi ma'lum qilindi.

Demak, muxlislar uchun bu "ertalabki" adrenalin bo'ladi: kimdir uyqudan turib tomosha qiladi, kimdir esa umuman uxlamay chiqadi — chunki kard bunga arziydigan ko'rinadi. Qisqasi, Oq Uydagi UFC kechasi allaqachon tarixiy tus olayapti: nomlar katta, to'qnashuvlar kuchli va intriga maksimal darajada.

Endi navbat jangchilarda: ular gapni oktagonda aytishadi. Ma'lumot manbasi: One.uz.