O‘zbekiston ayollar terma jamoasi Osiyo Kubogining chorak finaliga chiqa oldi
Avstraliyada bo‘lib o‘tayotgan ayollar o‘rtasidagi Osiyo Kubogi musobaqasi har kuni yanada qizg‘inlashib bormoqda. Bu haqda Zamin.uz xabar berdi.
O‘zbekistonlik muxlislar uchun eng quvonarli va tarixiy yangilik shundaki, milliy terma jamoamiz guruh bosqichidagi ishtirokini muvaffaqiyatli yakunlab, chorak finalga yo‘llanmani qo‘lga kiritdi. Endi esa futbolchilarimiz oldida eng katta sinovlar, noyob imkoniyatlar va asosiy orzu bo‘lgan 2027 yilgi Jahon chempionatiga chiqish masalasi turibdi.
Bizning jamoamiz B guruhida janubiy koreyaliklar, xitoyliklar va bengladeshliklarga qarshi maydonga tushdi. O‘tkazilgan uchta o‘yin yakunida vakillarimiz bitta g‘alaba va ikkita mag‘lubiyat qayd etib, umumiy holda uchta ochko to‘pladi.
Guruhda kuchlar taqsimoti quyidagicha bo‘ldi: Xitoy jamoasi to‘qqiz ochko bilan birinchi, Shimoliy Koreya olti ochko bilan ikkinchi va O‘zbekiston uch ochko bilan uchinchi o‘rinni egalladi. Bangladesh jamoasi esa barcha o‘yinlarda yutqazib, guruhni yakunladi.
Bir qarashda uchinchi o‘rinni egallash shunchaki natija bo‘lib tuyulishi mumkin, lekin turnir reglamenti aynan shu o‘rinni ham katta shansga aylantirdi. Reglamentga ko‘ra, barcha guruhlarda uchinchi bo‘lgan jamoalar orasida eng yaxshi ko‘rsatkichga ega termalar pley-off bosqichiga o‘tadi.
Ana shu reytingda O‘zbekiston terma jamoasi Vetnamdan keyin ikkinchi o‘rinni band etib, chorak finalga chiqishni ta’minladi. Filippin jamoasi ham uch ochko to‘plagan bo‘lsa-da, to‘plar farqi bo‘yicha bizning futbolchilarimiz ustun chiqdi.
Bu holat turnirda har bir gol, har bir daqiqa va har bir epizodning qanchalik muhim ekanligini yana bir bor isbotladi. Chorak finalda kimlar bilan o‘ynashimiz hozirgi kunda boshqa guruhlardagi natijalar yakuniga bog‘liq.
Hozircha ikki variant mavjud: birinchi holatda biz Sidney shahrida A guruhini yutib olgan Janubiy Koreya jamoasiga qarshi maydonga tushamiz, ikkinchi holatda esa C guruhining g‘olibiga qarshi kurashamiz. Qaysi raqib bo‘lishidan qat’i nazar, bundan keyin oson o‘yin degan tushuncha yo‘q ekanligi aniq.
Bu chorak final o‘yinlari shu sababdan ham juda muhimdir, chunki turnirdagi eng yaxshi oltita jamoa 2027 yilgi Jahon chempionatiga to‘g‘ridan-to‘g‘ri yo‘llanma oladi. Demak, chorak finaldagi g‘alaba biz uchun mundialga yo‘llanmani deyarli naqd qilish degani.
Agar O‘zbekiston terma jamoasi chorak finalda g‘alaba qozansa, Jahon chempionatiga chiqish masalasi hal bo‘ladi. Agar mag‘lub bo‘lsak ham, imkoniyat to‘liq yopilmaydi.
Chorak finalda yutqazgan jamoalar o‘tish o‘yinlarida qatnashib, qolgan yo‘llanmalar uchun kurashni davom ettiradi. U yerda chorak finalda mag‘lub bo‘lganlar o‘zaro bellashib, oxirgi imkoniyatlardan foydalanishga harakat qiladilar.
O‘zbekiston qizlari guruhda qiyin yo‘dan o‘tdi, lekin eng muhimini qildi va pley-offga chiqdi. Endi esa haqiqiy katta sahna boshlanyapti, bir g‘alaba bizni Jahon chempionatiga yetaklaydi va yana bir g‘alaba esa yangi tarix yaratadi.
Muxlislardan qoladigan ish bitta, ishonchni qattiq ushlash va duolarni tejamaslikdir. Manba: One.uz
