Eron futbolchilari Avstraliyada g'oyib bo'lib, maxsus boshpanaga joylandi
Avstraliyada bo'lib o'tayotgan ayollar o'rtasidagi Osiyo Kubogi futbol turniri kutilmagan va shov-shuvli hodisa bilan dunyoga mashhur bo'ldi. Bu haqda Zamin.uz xabar berdi.
Musobaqada ishtirok etgan Eron ayollar terma jamoasining besh nafar sportchisi o'zlarini mehmonxonadan chiqarib yuborishgan va bir muddat g'oyib bo'lib qolishdi. Ma'lumotlarga ko'ra, ushbu futbolchilar dushanba kungi kechki ovqatga kelishmagan va ularning qayerdaligi haqida dastlab aniq ma'lumot bo'lmagan edi.
Keyinchalik aniqlanishicha, sportchilar mahalliy politsiya yordamida xavfsiz joyga ko'chirilgan va hozirda Avstraliya federal politsiyasi nazorati ostidagi maxsus boshpanada saqlanmoqda. Ushbu voqealar ortidan jiddiy siyosiy va sportga oid bahslar boshlandi.
Eron terma jamoasi guruh bosqichining so'nggi uchrashuvida Filippin terma jamoasiga ikki gollik hisobda yutqazib, musobaqani tark etgan edi. Biroq, jamoa o'z vataniga qaytishi bilan bog'liq jarayonlar murakkablashib ketdi.
Avvalroq Eron davlat televideniesida ishlaydigan boshlovchi Muhammad Rizo Shahboziy milliy madhiyani kuylashdan bosh tortgan futbolchi qizlarni keskin tanqid qilgan va ularga nisbatan qattiqqo'l bo'lish kerakligini aytgan edi. Ushbu tahdidli bayonotdan so'ng, butun dunyodagi professional futbollarlarni himoya qiluvchi FIFPro tashkiloti FIFA va Osiyo futbol konfederatsiyasiga murojaat qilib, qizlarning xavfsizligini ta'minlashni talab qilgan edi.
Ayni paytda xalqaro tashkilotlar hamda Avstraliya hukumati vaziyatni to'liq nazoratga oldi. Xalqaro sport jurnalistikasi sohasida mashhur The Athletic nashri xabar berishicha, tomonlar Eron ayollar terma jamoasining mamlakatda qolish muddatini uzaytirish masalasini faol muhokama qilmoqda.
Hozircha butun jamoa uchun qaytish reysi band qilinmagan va vaziyat o'zgarishi mumkin. FIFA hamda Osiyo futbol konfederatsiyasi sportchilarning xavfsizligini kafolatlash uchun barcha zarur choralarni ko'rmokda.
Eronlik futbolchilarning bunday qadami ularning vatanidagi siyosiy bosim va xavfsizlik bilan bog'liq chuqur xavotirlar natijasi ekani taxmin qilinmoqda. Voqealar rivoji hozirda butun xalqaro hamjamiyatning diqqat markazida qolmoqda va kelgusi kunlarda yangi ma'lumotlar kutilmoqda.
Manba: The Athletic
