Eron Sardor Azmun mol-mulklarini musodara qilishni boshladi
Eron hukumati mashhur futbolchi Sardor Azmungga nisbatan jiddiy choralar ko‘rishni boshladi. Bu haqda Zamin.uz xabar berdi.
Manbalarga ko‘ra, u «sionistik rejim va Amerika Qo‘shma Shtatlarining terrorchi hukumati»ga yordam berganlikda gumon qilinmoqda. 26 mart kuni Golestan viloyati bosh prokurori 16 nafar fuqaroning rasmiy ro‘yxatdan o‘tgan mol-mulklarini musodara qilish jarayoni boshlanganini ma’lum qildi.
Fars News Agentligi xabariga ko‘ra, ushbu “qora ro‘yxat”da 31 yoshli hujumchi Sardor Azmun ham bor. Bu voqea futbolchi atrofidagi bahs-munozaralarni yanada kuchaytirdi.
Oldinroq ommaviy axborot vositalarida uni milliy jamoa safidan chetlatilgani haqida xabarlar tarqalgan edi. Bunga sabab sifatida uning ijtimoiy tarmoqlarda Muhammad ibn Rashid Al Maktum bilan tushgan suratini joylashtirgani ko‘rsatilgan.
Foto: Getty Images. Sardor Azmun 2024/25 yilgi mavsumdan boshlab Birlashgan Arab Amirliklarining «Shabob Al Ahli» klubida o‘ynamoqda.
Ba’zi eronlik futbol tahlilchilari bu harakatni hukumat siyosatiga nisbatan sadoqatsizlik belgisi deb baholamoqda. Shuning uchun ham bu holat nafaqat sport, balki siyosiy sohalarda ham keng muhokamalarga sabab bo‘lmoqda.
Mutaxassislarning fikricha, bunday qarorlar futbolchining faoliyati va xalqaro imijiga jiddiy ta’sir ko‘rsatishi mumkin. Endilikda e’tibor ushbu masalaning qanday yakunlanishi va Sardor Azmunning keyingi taqdiri qanday bo‘lishiga qaratilgan.
Manba: Fars News Agency.
