Chelsi inqiroz yoqasida yetakchi futbolchilar jamoani tark etmoqda
Angliya Premyer-ligasining nufuzli klublaridan biri hisoblangan Chelsi jamoasida og‘ir davr davom etmoqda. Bu haqda Zamin.uz xabar berdi.
Jamoa boshqaruviga kelganiga hali ko‘p bo‘lmagan murabbiy Liam Rosenyor o‘z oldiga qo‘yilgan vazifalarni bajara olmayapti. Yanvar oyida tayinlangan mutaxassis jamoaning o‘yin uslubini shakllantirish va natijalarni barqarorlashtirishga uringan bo‘lsa-da, ko‘rsatilgan o‘yinlar klub rahbariyatini mutlaqo qoniqtirmayapti.
Natijalarning kutilganidan past bo‘lishi nafaqat muxlislar, balki klub ichidagi muhitga ham salbiy ta’sir ko‘rsatmoqda. Klubdagi noaniqliklar sababli asosiy tarkib futbolchilari jamoani tark etish haqida o‘ylay boshlashdi.
Xususan, Enso Fernandes, Mark Kukurelya va Moyses Kaysedo kabi yetakchi o‘yinchilarning kelajagi so‘roq ostida qolmoqda. Hatto jamoaning eng yorqin yulduzi Koul Palmerning ham kelgusi mavsumda qayerda to‘p surishi aniq emasligi vaziyatni yanada chigallashtirmoqda.
Futbolchilarning fikricha, Rosenyorning tajribasi Chelsi kabi yirik maqsadlar sari intilayotgan klubni boshqarish uchun yetarli emas. Bu esa murabbiyga nisbatan bosimning kun sayin ortishiga olib kelmoqda.
Football Insider nashrining xabar berishicha, klub rahbariyati allaqachon yangi nomzodlar qidirishni boshlab yuborgan. Hozirda agentlar va vositachilar orqali murabbiylar bozori o‘rganilmoqda va Rosenyorning iste’fosi deyarli hal bo‘lgan masala sifatida qaralmoqda.
Klub rahbariyati kelgusi qadamlar bo‘yicha turli variantlarni ko‘rib chiqmoqda. Nomzodlar ro‘yxatida Sesk Fabregas va Frenk Lempard kabi klub afsonalari, shuningdek, Luis Enrike va Unai Emeri kabi tajribali mutaxassislar bor.
Bundan tashqari, Premyer-ligada o‘zini ko‘rsatgan Marku Silva, Oliver Glasner hamda Andoni Iraola kabi murabbiylar ham e’tibor markazida. Ayniqsa, ularning shartnomalari mavsum oxirida yakunlanishi klub uchun qulay imkoniyat hisoblanadi.
Chelsi muxlislari esa jamoa yana bir katta o‘zgarishlar ostonasida turganidan xavotirda. Klub qaysi yo‘lni tanlashi va vaziyat qanday yakun topishi yaqin orada ma’lum bo‘ladi.
