Hamzat Chimayev Xabib Nurmagomedov bilan munosabatlari haqida gapirdi

UFCning o‘rta vazn toifasidagi amaldagi chempioni Hamzat Chimayev MMA olamining afsonaviy vakili Xabib Nurmagomedov bilan bo‘lgan munosabatlari haqida ochiq gapirdi. Bu haqda Zamin.uz xabar berdi.

Sportchi ko‘pchilik tomonidan tarqalgan noto‘g‘ri tushunchalarga nuqta qo‘yib, ular o‘rtasida hech qanday ziddiyat yoki kelishmovchilik mavjud emasligini ta’kidladi. Chimayev Xabib Nurmagomedovni sport tarixidagi eng buyuk va kuchli jangchilardan biri deb hisoblaydi.

Uning aytishicha, u bolaligidanoq Xabibning yutuqlari va kurash uslubiga qoyil qolgan holda ulg‘aygan hamda hozirgi kunda ham unga nisbatan chuqur hurmat saqlaydi. Sportchi Xabibdan doim ilhom olganini va uni o‘ziga namuna deb bilishini qayd etdi.

Ijtimoiy tarmoqlarda ikki jangchi o‘rtasida tushunmovchiliklar borligi haqidagi xabarlar ko‘p tarqalgan edi. Biroq Hamzat bularning barchasi asossiz ekanligini va real hayotda vaziyat butunlay boshqacha ekanini bildirdi.

U Xabibni nafaqat hamkasb, balki yaqin inson va dindosh aka sifatida ko‘rishini ta’kidladi. Shuningdek, Chimayev ikkalasining ham kamtar sharoitda ulg‘aygani va bir-birini yaxshi tushunishiga ishora qildi.

U Xabib bilan o‘rtasidagi aloqalarni islomiy birodarlik va aka-uka munosabatlari deb atadi. Sportchining ta’kidlashicha, ular ikkalasi ham kambag‘al qishloqlardan chiqib, katta cho‘qqilarga erishganlari sababli o‘zaro tushunish darajasi juda yuqori.

One.uz xabariga ko‘ra, Hamzat Chimayev o‘zining navbatdagi jangi bilan muxlislarni kutmoqda. U 10 may kuni bo‘lib o‘tadigan UFC 328 turnirida amerikalik Shon Striklendga qarshi ringga chiqadi.