Bernardu Silva Manchester Siti klubini tark etishini e'lon qildi
Manchester Siti klubining yarimhimoyachisi Bernardu Silva mavsum yakunlangach jamoani tark etishini e'lon qildi. Bu haqda Zamin.uz xabar berdi.
Futbolchi ijtimoiy tarmoqlarda muxlislar va klub xodimlariga yo'llagan samimiy xatida o'z his-tuyg'ularini bo'lishdi. Silva shaharliklar safidagi to'qqiz yillik faoliyatini hayotining eng muhim bosqichi deb atadi.
Uning ta'kidlashicha, klubga kelgan ilk kunlarida oddiygina muvaffaqiyat qozonishni orzu qilgan edi, biroq vaqt o'tishi bilan kutilganidan ham ko'proq yutuqlarga erishdi. Futbolchi jamoa bilan birgalikda qo'lga kiritgan tarixiy natijalarni eslab, ayniqsa ketma-ket to'rt marta chempionlikni qo'lga kiritganini va Chempionlar Ligasidagi g'alabasini alohida ta'kidladi.
Sportchi uchun Manchester shahrining ahamiyati faqat futbol bilan cheklanmagan. U shu yerda oila qurganini va bu shahar uning ikkinchi uyiga aylanganini aytdi.
Silva o'z rafiqasi va farzandiga qo'llab-quvvatlagani uchun minnatdorchilik bildirdi. Shuningdek, u muxlislarning beqiyos ishonchi va qo'llab-quvvatlovi unga har doim kuch berganini qayd etdi.
Futbolchining asosiy maqsadi maydonda jamoa sha'nini munosib himoya qilish va ishqibozlar faxrlanishiga sabab bo'lish bo'lganini yozdi. Bernardu Silva bosh murabbiy Pep Gvardiola, klub xodimlari va jamoadoshlariga ham rahmat aytdi.
U mashg'ulot bazasidagi do'stona muhit o'zini katta oilaning bir qismidek his qilishiga yordam berganini ta'kidladi. Futbolchi mavsumning oxirgi haftalarida barcha g'alabalar uchun kurashishga chaqirdi va klubni tark etsa-da, doimo uning ashaddiy muxlisi bo'lib qolishini ma'lum qildi.
Manba: One.uz
