Manchester Siti Arsenal ustidan g‘alaba qozonib chempionlikka yaqinlashdi

Angliya Premyer ligasining 33 turidagi eng asosiy bahslardan biri bo‘lgan Manchester Siti va Arsenal o‘rtasidagi uchrashuv yakunlandi. Bu haqda Zamin.uz xabar berdi.

Manchesterda bo‘lib o‘tgan ushbu bahs kutilganidek juda keskin va hayajonli kechdi. Chempionlik uchun kurashayotgan ikki jamoaning to‘qnashuvida Manchester Siti o‘z maydonida 2:1 hisobida g‘alaba qozondi.

O‘yin yuqori tempda boshlandi va 16-daqiqada Rayan Sherki aniq zarba orttiriib, hisobni ochdi. Biroq Arsenal jamoasi bu holatga uzoq vaqt befarq qolmadi.

18-daqiqada Kay Haverts raqib darvozabonining xatosidan foydalanib, hisobni tenglashtirdi. Ikkinchi bo‘limda esa o‘yinning taqdirini Erling Xoland hal qildi.

U 65-daqiqada urgan goli bilan Siti jamoasini yana oldinga olib chiqdi. Ushbu bahsda o‘zbekistonlik futbolchi Abduqodir Husanovning ishtiroki alohida e’tiborni tortdi.

Milliy terma jamoamiz himoyachisi asosiy tarkibda maydonga tushdi va to‘liq 90 daqiqa davomida harakat qildi. Yosh himoyachi o‘z pozitsiyasida ishonchli o‘ynab, 6.8 bahoga loyiq ko‘rildi va murabbiy ishonchini oqladi.

Statistikaga ko‘ra, Siti safida eng yuqori ko‘rsatkichga Rayan Sherki (8.4) erishdi. Shuningdek, Rodri va Jeremi Doku ham jamoa g‘alabasiga sezilarli hissa qo‘shdi.

Arsenal tomonida esa Kay Haverts eng faol futbolchilardan biri bo‘ldi, ammo Martin Edegor va Deklan Rays kutilgan natijani ko‘rsata olishmadi. Darvozabonlar orasida Janluidji Donnarumma va David Rayya o‘rtacha o‘yin namoyish etishdi.

Ushbu g‘alaba bilan Pep Gvardiola shogirdlari ochkolarini 67 taga yetkazib, jadvalning ikkinchi o‘rnini egallashdi. Ular peshqadam Arsenal jamoasidan atigi 3 ochko orqada qolmoqdalar va qo‘shimcha o‘yin o‘tkazish imkoniyatiga ega.

Bu esa chempionlik poygasi hali yakunlanmaganini va har bir uchrashuv hal qiluvchi ahamiyatga ega ekanini anglatadi. Manba: One.uz