Liam Rosenor Chelsi tarixidagi eng qisqa muddatli murabbiy bo'ldi
Liam Rosenor Londonning Chelsi klubi tarixida vaqtinchalik murabbiylarni hisobga olmaganda eng qisqa muddat ishlagan mutaxassis sifatida qayd etildi. Bu haqda Zamin.uz xabar berdi.
Uning klubdagi loyihasi kutilganidan ancha erta yakuniga yetdi. Angliyalik mutaxassis jamoani atigi 104 kun davomida boshqardi.
Shu tariqa u 2012-yilda Chelsi safida 118 kun faoliyat yuritgan Roberto Di Matteoning rekordini yangiladi. Biroq Rosenorlar oilasidagi eng tez ishdan ketish rekordi hali ham uning otasi Leroy Rosenorga tegishli bo‘lib turibdi.
Ma’lumotlarga ko‘ra, Leroy 2007-yilda Torki Yunayted klubiga bosh murabbiy etib tayinlanganidan so‘ng, oradan atigi 10 daqiqa o‘tib lavozimidan ozod etilgan edi. O‘shanda klub egalari o‘zgargani sababli yangi rahbariyat qarorni darhol bekor qilgan.
Liam Rosenor joriy yilning yanvar oyida Strasburg jamoasidan Chelsi tarkibiga kelib qo‘shilgan edi. Klub rahbariyati u bilan 2032-yilgacha mo‘ljallangan uzoq muddatli shartnoma imzolagan bo‘lsa-da, maydondagi salbiy natijalar barcha rejalarni chippakka chiqardi.
Jamoaning o‘yini muxlislar va rahbariyat kutgan darajada shakllanmadi. Hozirgi vaqtda Chelsi Angliya premer ligasida 34 ta turdan so‘ng 48 ochko jamg‘argan holda turnir jadvalining yettinchi pog‘onasini egallab turibdi.
Jamoa so‘nggi beshta uchrashuvning barchasida mag‘lubiyatga uchrab, chuqur inqiroz yoqasiga kelib qolgan. Rosenorning qisqa muddatli faoliyati klubdagi bosim va talablar naqadar yuqori ekanini yana bir bor tasdiqladi.
One.uz nashri xabariga ko‘ra, jamoa rahbariyati endi yangi nomzodlar ustida ish boshlagan.
