Vensan Kompani «Bavariya» yosh yarim himoyachisining debyutiga izoh berdi
Myunxenning Bavariya jamoasi bosh murabbiyi Vensan Kompani Germaniya chempionati doirasida Mayns klubiga qarshi kechgan bahs oldidan 18 yoshli Bara Sapoko Ndiayening kutilmagan debyuti haqida to‘xtalib o‘tdi. Bu haqda Zamin.uz xabar berdi.
Yosh yarim himoyachi maydon markazida Aleksandr Pavlovich bilan birga asosiy tarkibda o‘yinni boshladi. Jamoa ustozi bunday uchrashuvlar yosh futbolchilar uchun oson kechmasligini va bu ular uchun katta sinov ekanini alohida qayd etdi.
Goal.com nashri xabariga ko‘ra, Kompani o‘z shogirdlaridan turnir jadvalining quyi pog‘onalarida borayotgan raqibga qarshi safar o‘yinida yuqori darajadagi tajriba va yetuklik ko‘rsatishni talab qilgan. Murabbiyning ta’kidlashicha, Ndiaye ushbu imkoniyatni mashg‘ulotlardagi tinimsiz mehnati bilan qo‘lga kiritgan.
Shu kuni jamoaning asosiy yetakchilaridan biri Joshua Kimmixga dam berildi, Jamal Musiala esa zaxirada qoldirilib, uning o‘rnini Leon Goretzka egalladi. Myunxenliklar o‘tgan turda Shtutgart jamoasini mag‘lub etib, chempionlik unvonini muddatidan oldin naqd qilib bo‘lgani bois, murabbiylar shtabi tarkibda tajribalar o‘tkazishga qaror qildi.
Kelib chiqishi senegallik bo‘lgan markaziy yarim himoyachi Ndiaye Bavariyaning Afrikadagi hamkori hisoblangan Gambinos Stars klubi tarbiyalanuvchisi sanaladi. U o‘tgan yozda jamoa ko‘rigida bo‘lgan va o‘zining iqtidori bilan Vensan Kompanining e’tiborini tortishga ulgurgan edi.
Hozirda yosh futbolchi ijara asosida to‘p surmoqda, biroq Germaniya grandi yozgi transfer oynasi vaqtida uning huquqlarini to‘liq sotib olishni rejalashtirmoqda. Ndiaye bungacha Germaniya chempionatida Sankt-Pauli va Shtutgart klublariga qarshi bahslarda zaxiradan maydonga tushgan edi.
Shuningdek, u Germaniya kubogi yarim finalida Bayerga qarshi kechgan muhim o‘yin qaydnomasiga ham kiritilgan. Mayns bilan bahsda Kompani yana uch nafar akademiya tarbiyalanuvchisi — Deniz Ofli, Rafael Pavlich va Bastian Assomoni ham zaxira o‘rindig‘iga jalb etdi.
Bu holat klubning yosh iqtidorlarga bo‘lgan ishonchi ortib borayotganidan dalolat beradi.
