Marsel Desayi Maykl Olisening «Bavariya»dagi kelajagi haqida gapirdi
Fransiya terma jamoasining sobiq himoyachisi, jahon chempioni Marsel Desayi Myunxenning Bavariya klubi hujumchisi Maykl Olisening kelajagi haqida o‘z mulohazalarini o‘rtoqlashdi. Bu haqda Zamin.uz xabar berdi.
Tajribali sobiq futbolchining fikricha, 24 yoshli iqtidor egasi Germaniya grandida uzoq vaqt qolmaydi. Bu haqda Goal.com nashri xabar tarqatdi.
Desayi Oliseni o‘ziga xos mahoratga ega bo‘lgan va jamoa hujumkorligini ta’minlovchi asosiy kuch sifatida ta’rifladi. Uning ta’kidlashicha, futbolchining to‘p bilan ishlash qobiliyati va maydondagi tartib-intizomi hayratlanarli darajada yuqori bo‘lib, u hozirda dunyoning eng yaxshi o‘yinchilari qatoridan joy olgan.
Maykl Olise 2024-yilda Angliyaning Kristal Pelas jamoasidan 53 million yevro evaziga Bavariya safiga kelib qo‘shilgan edi. Qisqa vaqt ichida ko‘rsatgan yorqin o‘yini tufayli unga Madridning Real, Kataloniyaning Barselona va Angliyaning Liverpul kabi nufuzli klublari jiddiy qiziqish bildira boshladi.
Ma’lumotlarga ko‘ra, Liverpul jamoasi iqtidorli hujumchi uchun 200 million yevro to‘lashga ham tayyor turibdi. Bunday katta qiziqishlarga qaramay, Bavariya rahbariyati vaziyatni to‘liq nazorat qilmoqda va xotirjamlikni saqlab qolgan.
Klub bosh direktori Yan-Kristian Drezen va sport direktori Maks Eberl futbolchi bilan 2029-yilga qadar amalda bo‘lgan shartnoma mavjudligini eslatib o‘tishdi. Ular Oliseni yaqin vaqt ichida sotish niyatida emasliklarini hamda u jamoaning kelajakdagi rejalari uchun muhim o‘rin tutishini ta’kidlashmoqda.
Joriy mavsumda Maykl Olise myunxenliklar safida barcha musobaqalarda 44 ta uchrashuvda ishtirok etib, o‘z hisobiga 18 ta gol va 29 ta samarali uzatmani yozdirib qo‘ydi. Uning sermahsul harakatlari evaziga Bavariya o‘z tarixida 30-marta Germaniya chempionligini tantana qildi.
Hozirda jamoa Yevropa Chempionlar ligasining yarim finalida Fransiyaning Pari Sen-Jermen klubiga qarshi o‘tadigan muhim bahslarga tayyorgarlik ko‘rmoqda.
