Florentino Peres Ispaniya chempionati hakamlari faoliyatini keskin tanqid qildi
Real Madrid klubi prezidenti Florentino Peres seshanba kungi chiqishida Ispaniya chempionati hakamlari faoliyatini keskin tanqid qildi. Bu haqda Zamin.uz xabar berdi.
Klub rahbari jamoasining chempionlik poygasidagi muvaffaqiyatsizliklarida bevosita hakamlar tomonidan qabul qilingan qarorlarni asosiy sabab qilib ko‘rsatdi. Goal.com nashri bergan xabarga ko‘ra, Peres joriy mavsumda hakamlarning xatolari tufayli Real Madrid jamoasi muhim o'n sakkiz ochkodan mahrum bo‘lganini alohida ta’kidlab o‘tdi.
Prezident o‘z rahbarligi davrida klub atigi yetti marta mamlakat chempionligini qo‘lga kiritganidan noroziligini bildirdi. Uning fikricha, agar adolatli hakamlik bo‘lganida, jamoa o‘n to‘rtta chempionlik unvoniga ega chiqishi mumkin edi.
Peres bu borada tizimda jiddiy muammolar borligiga e’tibor qaratdi va mavjud vaziyatni futbol rivojiga to‘siq deb atadi. Shuningdek, Florentino Peres shov-shuvli Negreyra ishi bo‘yicha ham o‘z munosabatini ochiq bayon qildi.
U ushbu voqeani futbol tarixidagi eng yomon mojaro deb baholadi. Barselona klubi tomonidan hakamlar qo‘mitasi sobiq o‘rinbosariga katta miqdorda mablag‘ to‘langanligi masalasi hanuzgacha ochiq qolayotgani klub rahbarini qattiq tashvishga solmoqda.
Real Madrid rahbari Negreyra davrida ishlagan hakamlar hamon yuqori saviyadagi o‘yinlarni boshqarib kelayotganini mantiqsiz deb hisoblaydi. Uning so‘zlariga ko‘ra, raqib jamoa yillar davomida hakamlar tizimidagi shaxslar bilan shubhali aloqada bo‘lganiga qaramay, sohada hech qanday jiddiy islohotlar amalga oshirilmagan.
Peres adolat qaror topishi uchun tizim butunlay yangilanishi zarurligini talab qilmoqda.
