«Manchester Siti» va «PSJ» Federiko Valverdeni sotib olmoqchi
Madridning Real klubi yarim himoyachisi Federiko Valverde Yevropaning eng boy jamoalari bo‘lmish Manchester Siti va PSJ e’tiborini tortmoqda. Bu haqda Zamin.uz xabar berdi.
Urugvaylik iqtidorli futbolchining jamoadoshi Orelien Chuameni bilan mashg‘ulotlar jarayonida yuzaga kelgan kelishmovchiligi uning kelajagi borasidagi turli taxminlarga sabab bo‘ldi. Garchi Valverde Madrid klubida qolishni va faoliyatini aynan shu yerda davom ettirishni istayotgan bo‘lsa-da, qit’aning grand klublari yuzaga kelgan noqulay vaziyatdan foydalanib qolishga harakat qilmoqda.
Bu haqda Goal.com nashri ma’lumot tarqatdi. Fransiyaning PSJ klubi ancha vaqtdan buyon Federiko Valverdega qiziqish bildirib keladi.
Parijliklar yarim himoya chizig‘ini kuchaytirish maqsadida futbolchining transferi uchun 100 milliondan 120 million yevrogacha mablag‘ sarflashga tayyor ekanliklarini bildirishgan. Ular Valverdeni o‘z jamoalari uchun eng munosib nomzod sifatida ko‘rmoqda.
Shu bilan birga, Manchester Siti jamoasi ham bosh murabbiy Pep Gvardiolaning shaxsiy talabiga binoan ushbu transfer poygasiga jiddiy kirishgan. Real Madrid rahbariyati mashg‘ulot paytida yuz bergan tartibsizlikka nisbatan qat’iy chora ko‘rdi.
Ma’lumotlarga ko‘ra, har ikki futbolchi intizomni buzgani uchun 500 ming yevro miqdorida jarimaga tortilgan. Jamoa murabbiyi Alvaro Arbeloa kiyim almashtirish xonasida sodir bo‘lgan ichki gaplarning matbuotga sizib chiqishini klub qadriyatlariga xiyonat deb baholadi.
Shunga qaramay, murabbiylar shtabi vaziyatni yumshatish va jamoa ichidagi muhitni tiklashga harakat qilmoqda. Hozirgi vaqtda Federiko Valverde jarohati sababli o‘n kundan ikki haftagacha davom etadigan dam olish rejimiga o‘tkazilgan.
Futbolchining kelajagi va uning boshqa klubga o‘tish ehtimoli yaqin vaqtlar ichida aniq bo‘lishi kutilmoqda.
