«Manchester Siti» Trua jamoasidan vinger Matis Deturbeni qo‘shib oldi

Angliyaning Manchester Siti klubi Fransiyaning Trua jamoasidan vinger Matis Deturbeni o‘z safiga qo‘shib oldi. Bu haqda Zamin.uz xabar berdi.

Trua matbuot xizmati 19 yoshli futbolchining shaharliklar safiga o‘tganini rasman e’lon qildi. E’tiborlisi, har ikki klub ham City Football Group tarkibida faoliyat yuritmoqda.

Zamin.uz ushbu ehtimoliy transfer haqida 2025 yil 19 dekabrdayoq xabar bergan edi. Saytimizda o‘sha kuni Matis Deturbe Manchester Siti klubini tanlashi mumkin sarlavhasida maqola e’lon qilingandi.

Oradan bir necha oy o‘tib, mazkur transfer rasman tasdiqlandi. L’Équipe nashri ma’lumotiga ko‘ra, Manchester Siti yosh futbolchi uchun 25 million yevro to‘lagan.

Biroq Deturbe yangi mavsumni Manchesterda boshlamasligi mumkin. Manbaga ko‘ra, shaharliklar uni yaqin kunlarda Monako jamoasiga sotib olish huquqi bilan ijaraga berishni rejalashtirmoqda.

Matis Deturbe o‘tgan mavsum Fransiya ikkinchi ligasida 33 ta uchrashuvda maydonga tushib, 3 ta gol urdi va 5 ta golli uzatmani amalga oshirdi.