«Milan» «Liverpul» himoyachisi Virgil van Deykni sotib olmoqchi
Italiyaning Milan klubi yozgi transfer mavsumida futbol olamini hayratda qoldiradigan yirik kelishuv ustida ish boshladi. Bu haqda Zamin.uz xabar berdi.
Klub rahbariyati, xususan, jamoa maslahatchisi lavozimida faoliyat yuritayotgan afsonaviy Zlatan Ibrahimovich tashabbusi bilan Liverpul sardori Virgil van Deykni Italiyaga olib kelish rejalashtirilmoqda. Ushbu nufuzli transfer Milan jamoasini yana Yevropa futboli cho‘qqisiga qaytarish yo‘lidagi yangi davrning poydevori bo‘lishi kutilmoqda.
Goal.com nashri tarqatgan xabarlarga ko‘ra, rossonerilar himoya chizig‘ini aynan tajribali niderlandiyalik futbolchi bilan mustahkamlamoqchi. La Gazzetta dello Sport nashri ma’lumotlariga ko‘ra, Milan hujumchi Gonsalo Ramos transferini 70 million yevro evaziga hal qilganidan so‘ng, bor e’tiborini himoyaga qaratgan.
Klub xo‘jayini Gerri Kardinale va Zlatan Ibrahimovich niderlandiyalik himoyachini yangi bosh murabbiy Ruben Amorim loyihasidagi eng muhim figura sifatida ko‘rmoqda. Ibrahimovichning fikricha, aynan Van Deyk kabi yetakchilik qobiliyatiga ega futbolchi jamoaning ichki muhitini va o‘yin sifatini butunlay yangi bosqichga olib chiqa oladi.
Ayni paytda Liverpul jamoasida katta o‘zgarishlar davri kechmoqda. Mersisaydliklar safini allaqachon Muhammad Saloh va Endryu Robertson kabi yetakchilar tark etgan.
Shuningdek, Ibrahima Konate erkin agent sifatida Madridning Real klubiga o‘tishi kutilmoqda. Bunday vaziyatda Liverpul o‘z sardorini qo‘yib yuborishni istamasligi aniq, biroq Van Deykning amaldagi shartnomasi yakunlanib borayotgani Milan uchun qulay imkoniyat yaratmoqda.
Italiya klubi ushbu holatdan unumli foydalanib, nufuzli himoyachini o‘z safiga qo‘shib olishga harakat qiladi. RedBird investitsiya kompaniyasi hozirda ushbu transferning moliyaviy jihatlarini va iqtisodiy samaradorligini chuqur o‘rganib chiqmoqda.
Van Deyk Liverpul safida 374 ta uchrashuvda maydonga tushib, 36 ta gol urishga muvaffaq bo‘lgan va dunyoning eng kuchli himoyachilaridan biri ekanini bir necha bor isbotlagan. U Angliyadagi faoliyati davomida Chempionlar ligasi va Angliya Premer-ligasi kabi nufuzli musobaqalarda g‘oliblikni qo‘lga kiritgan.
Agar Virgil van Deyk transferi bo‘yicha muzokaralar kutilgan natijani bermasa, Milan rahbariyati zaxira variantini ham ko‘rib chiqmoqda. Unga ko‘ra, Sporting jamoasi himoyachisi Gonsalo Inasio 40 million yevro evaziga jamoaga taklif etilishi mumkin.
Biroq Ibrahimovich va Ruben Amorim uchun aynan niderlandiyalik himoyachi asosiy maqsad bo‘lib qolmoqda. Liverpul esa o‘z navbatida bir vaqtning o‘zida bir nechta yetakchi futbolchilarini qo‘ldan boy bermaslik uchun Van Deykni saqlab qolishga bor kuchini sarflaydi.
Bu esa kelgusi muzokaralarning ancha murakkab va qiziqarli kechishidan dalolat beradi.
