«Barselona» Julian Alvaresni sotib olish uchun harakat boshladi
Ispaniyaning Atletiko Madrid klubi o‘zining asosiy yulduzlaridan biri Julian Alvares bilan xayrlashishga tayyorgarlik ko‘rmoqda. Bu haqda Zamin.uz xabar berdi.
Barselona klubi argentinalik hujumchini o‘z safiga qo‘shib olish uchun faol harakat boshlagani sababli, Madrid jamoasi rahbariyati uning o‘rnini bosa oladigan munosib nomzod qidirishga tushgan. Goal.com nashri xabariga ko‘ra, bosh murabbiy Diego Simeone ayni damda Marsel sharafini himoya qilayotgan Meyson Grinvud nomini asosiy maqsad sifatida belgilagan.
Barselona rahbariyati Robert Levandovski davridan keyingi jamoa kelajagini aynan Julian Alvares bilan bog‘lamoqda. Kataloniyaliklar prezidenti Joan Laporta Atletiko Madridga rasmiy taklif yuborilganini tasdiqladi, biroq hozircha rad javobi olingan.
Laportaning so‘zlariga ko‘ra, Madrid klubi munosib o‘rinbosar topmaguncha o‘zining eng yaxshi to‘purarlaridan birini qo‘yib yubormoqchi emas. Bu esa transfer bozorida o‘ziga xos zanjir reaksiyasini keltirib chiqarmoqda.
Meyson Grinvud Ispaniya futboliga begona emas. U Getafe safida ijarada o‘ynab, o‘zining sermahsul o‘yinlari bilan yodda qolgan edi.
Shundan so‘ng u Fransiyaning Marsel klubiga ko‘chib o‘tdi va u yerda o‘zining eng yaxshi sport formasiga qaytdi. Fransiyada ingliz hujumchisi Liga 1 to‘purarlari qatoridan joy oldi va Yevropaning yirik klublari e’tiborini yana o‘ziga tortdi.
Diego Simeone Grinvudni hujum chizig‘ini kuchaytirish uchun ideal variant deb hisoblamoqda. Antuan Grizmann va Niko Gonsales kabi yetakchilarning ketishi Atletiko Madridni hujumda yangi kuch izlashga majbur qilmoqda.
Agar Madrid klubi Meyson Grinvud transferini ijobiy hal qilsa, bu Julian Alvaresning Barselona safiga o‘tishi uchun yo‘l ochadi. Biroq ushbu kelshuvda Manchester Yunayted klubining ham moliyaviy manfaatlari bor.
Ingliz klubi Grinvudni sotayotganda, keyingi transfer summasidan ma’lum ulush olish huquqini saqlab qolgan. Bu esa Atletiko Madrid uchun bitimning ancha qimmatga tushishini anglatishi mumkin.
Hozirda Julian Alvares bor e’tiborini Argentina terma jamoasi bilan navbatdagi muvaffaqiyatlarga qaratgan. U faoliyati davomida ko‘plab nufuzli sovrinlarni qo‘lga kiritib ulgurdi.
Barselona esa vaziyatni diqqat bilan kuzatib bormoqda. Kataloniyaliklar Atletiko Madridning muzokaralari yakunlanishini kutishmoqda.
Shundan so‘nggina Alvares uchun ikkinchi, yaxshilangan taklif bilan chiqish rejalashtirilgan. Ushbu transferlar zanjiri yozgi mavsumning eng shov-shuvli voqealaridan biriga aylanishi kutilmoqda.
