«Barselona» va Niderlandiya o‘rtasida Frenki de Yong tufayli nizo chiqdi
Ispaniyaning Barselona futbol klubi va Niderlandiya terma jamoasi o‘rtasidagi munosabatlar yarim himoyachi Frenki de Yongning jarohati tufayli keskin yomonlashdi. Bu haqda Zamin.uz xabar berdi.
Kataloniya klubi rahbariyati futbolchining salomatligi borasida terma jamoa murabbiylar shtabi va tibbiy xodimlari tomonidan noto‘g‘ri ma’lumot berilgan, deb hisoblamoqda. Dastlabki taxminlarga ko‘ra, mahoratli futbolchi olti oygacha maydonga tusha olmasligi mumkin.
Bu haqda Goal.com nashri ma’lumot tarqatdi. Xabarlarga ko‘ra, Frenki de Yong kutilganidan ertaroq klub ixtiyoriga qaytgan va o‘ng tizzasidagi kuchli shish tufayli tibbiy ko‘rikdan o‘tishni so‘ragan.
Jamoaning yangi bosh murabbiyi Hansi Flik bilan qisqa suhbatdan so‘ng o‘tkazilgan tekshiruvlar shifokorlarni hayratda qoldirdi. Ma’lum bo‘lishicha, futbolchining tizzasi mutlaqo beqaror holatga kelib qolgan.
Hozirda mutaxassislar tizzadagi bog‘lamlarning jiddiy shikastlanganidan shubha qilmoqdalar. Biroq tizzadagi kuchli ichki qon ketish va shish tufayli darhol aniq tashxis qo‘yishning imkoni bo‘lmagan.
Klub shish pasayishini bir necha kun kutishga majbur, shundan keyingina jarohatning aniq ko‘lami va jarrohlik amaliyoti zarurligi haqida yakuniy xulosa beriladi. Barselona rahbariyati Ronald Kuman va uning shtabini ma’lumotlarni qasddan yashirishda ayblamoqda.
Ma’lum bo‘lishicha, De Yong so‘nggi uchrashuvlarda og‘riq qoldiruvchi dorilar yordamida maydonga tushgan, ammo kataloniyaliklarga vaziyatning bu qadar jiddiy ekani haqida xabar berilmagan. Ayniqsa, Marokashga qarshi kechgan va qo‘shimcha vaqtlargacha davom etgan bahsda futbolchining to‘liq o‘ynatilgani jarohatni yanada og‘irlashtirgan.
Klub ichidagi manbalarning ta’kidlashicha, Ronald Kuman va Frenki de Yong bu vaziyat bo‘yicha jiddiy tushuntirish berishlari shart. Kataloniyaliklar terma jamoani futbolchining kelajakdagi faoliyatini xavf ostiga qo‘yib, qisqa muddatli natijalarni ustun qo‘yganlikda va beparvolikda ayblamoqda.
Ushbu holat ikki tomon o‘rtasidagi eski nizolarni ham qayta alanga oldirdi. Avvalroq Kuman Barselona rahbariyatini futbolchining sog‘lig‘iga noto‘g‘ri yondashganlikda ayblab, shu sababli De Yong Yevropa chempionatini o‘tkazib yuborganini aytgan edi.
Endilikda klub mutasaddilari niderlandiyalik mutaxassisning o‘zini asossiz tavakkalchilikda ayblamoqda. Shu bilan birga, Frenki de Yongning o‘ziga nisbatan ham e’tirozlar mavjud.
Klub rahbariyati futbolchi o‘z imkoniyatlarini to‘g‘ri baholashi va kuchli og‘riq sezganida o‘yinni to‘xtatishi kerak edi, deb hisoblamoqda. Agar jarrohlik amaliyoti o‘tkaziladigan bo‘lsa, yarim himoyachi kamida yarim yilni o‘tkazib yuboradi.
Bu esa Barselona uchun yangi mavsum oldidan juda katta yo‘qotish bo‘lishi aniq.
