«Milan» va «Yuventus» o'zaro futbolchi almashish masalasini ko'rib chiqmoqda
Italiyaning A Seriya bahslari boshlanishiga sanoqli kunlar qolgan bir pallada, mamlakatning ikki grand klubi — Milan va Yuventus o‘zaro futbolchi almashish masalasini ko‘rib chiqmoqda. Bu haqda One.uz xabar beradi.
Tuttosport nashri bergan ma’lumotlarga ko‘ra, har ikki jamoa o‘z rejalariga kirmay qolgan o‘yinchilarni bir-biriga o‘tkazish orqali tarkibni muvozanatga keltirishni maqsad qilgan. Mazkur kelishuv markazida milanliklar yarim himoyachisi Youssouf Fofana hamda turinliklar hujumchisi Nico Gonzalez turibdi.
Goal.com xabariga tayanib aytish mumkinki, ushbu almashinuv har ikki tomon uchun ham moliyaviy va taktik jihatdan foydali bo‘lishi kutilmoqda. Hozirgi vaqtda har ikki klub tarkibida turli sabablarga ko‘ra asosiy tarkibdan chetda qolgan o‘yinchilar talaygina.
Transfer oynasining so‘nggi kunlari yaqinlashgani sari, ushbu futbolchilar atrofidagi vaziyat o‘zgarib, raqib klublar uchun jozibali imkoniyatga aylanib bormoqda. Murabbiylar shtabi o‘z uslubiga mos kelmaydigan o‘yinchilardan voz kechib, jamoaviy o‘yinni kuchaytira oladigan yangi nomzodlarni qidirmoqda.
Maydon markazi va himoya uchun yangi nomzod Yuventus bosh murabbiyi jamoada sog‘lom raqobat muhiti yaratilishini va har bir pozitsiya uchun kamida ikki nafardan teng kuchli o‘yinchi bo‘lishini talab qilmoqda. Turinliklar uzoq vaqtdan beri himoya chizig‘i oldida to‘p suradigan, raqib hujumlarini buzib o‘tadigan va jismoniy jihatdan baquvvat markaziy yarim himoyachini qidirib kelayotgan edi.
Manuel Locatelli hamda Khephren Thuramga munosib sherik yoki raqobatdosh izlagan klub dastlab boshqa variantlarni ko‘rib chiqqan edi. Biroq Youssouf Fofana Milanning sotuvga qo‘yilgan o‘yinchilar ro‘yxatiga kiritilgach, futbolchining vakillari darhol Yuventus rahbariyati bilan bog‘lanib, sobiq Monako yarim himoyachisini Turin klubiga taklif qilishdi.
Fofananing jismoniy imkoniyatlari va maydon markazidagi qat’iyati jamoaning yangi strategiyasiga to‘la mos kelishi taxmin qilinmoqda. Bu transfer amalga oshsa, turinliklarning tayanch zonasi sezilarli darajada mustahkamlanadi.
Milan uchun hujum chizig‘ini kuchaytirish varianti O‘z navbatida, Milan jamoasi hujumkor yarim himoya chizig‘ini va hujumchi ortidagi pozitsiyani tubdan yangilash niyatida. Hozircha tarkibda faqat Pulisicning o‘rni kafolatlangan bo‘lib turibdi, boshqa yetakchi futbolchilarning jamoani tark etishi mumkinligi haqidagi xabarlar esa rahbariyatni yangi ijrochilar qidirishga majbur qilmoqda.
Ayniqsa, chaqqon va texnikasi yuqori bo‘lgan futbolchiga ehtiyoj katta. Aynan shu vaziyatda Nico Gonzalez Milanning e’tibor markaziga tushdi.
Futbolchi Turin klubida qolishni istamayotganini bildirgan bo‘lsa-da, uning agentlari o‘yinchini Milanga taklif qilishdi va qizil-qora klub bu variantga qat’iy rad javobini bermadi. Hozircha ushbu ayirboshlov shunchaki transfer g‘oyasi darajasida qolmoqda.
Futbolchilarning transfer qiymatlaridagi farqni bartaraf etish masalasi hal etilishi lozim, biroq ikki klub o‘rtasidagi munosabatlar bu kelishuvning ijobiy yakunlanishiga zamin yaratishi mumkin.
