Janibek Alimxanuli va Xamza Shiraz o'rtasidagi jang rasman belgilandi
Professional boksning o‘rta vazn toifasida navbatdagi yirik to‘qnashuvga rasman tayyorgarlik ko‘rilmoqda. Bu haqda One.uz xabar beradi.
Butunjahon boks tashkiloti amaldagi chempion, britaniyalik Xamza Shirazga qozog‘istonlik mahoratli bokschi Janibek Alimxanuliga qarshi chempionlik kamarini himoya qilish bo‘yicha ko‘rsatma berdi. Ushbu qaror diviziondagi kuchlar nisbatini belgilab beruvchi muhim qadam hisoblanadi.
Dunyoga mashhur ESPN nashri tarqatgan ma’lumotlarga ko‘ra, har ikki tomon vakillariga jang shartlari, o‘tkazilish joyi va kafolatlangan gonorarlar masalasini o‘zaro kelishib olish uchun bir necha haftalik rasmiy muzokara muddati belgilangan. Doping mojarosi va tashkilotning yakuniy qarori Janibek Alimxanuli atrofida bir muddat davom etgan noaniqliklar va turli taxminlar nihoyat rasman o‘z yechimini topdi.
O‘tgan yili sportchining qon tarkibida taqiqlangan modda aniqlangani haqidagi xabarlar tarqalgan va bu uning faoliyatiga jiddiy xavf solgan edi. Uzoq muddatli diskvalifikatsiya ehtimoli mavjud bo‘lishiga qaramay, bokschi va uning jamoasi Butunjahon boks tashkilotiga barcha zarur tibbiy asoslar hamda dalillarni o‘z vaqtida taqdim etishga muvaffaq bo‘ldi.
Tashkilot tomonidan e’lon qilingan rasmiy bayonotda qayd etilishicha, Alimxanulining ishi sinchkovlik bilan o‘rganib chiqilgan. Sportchi taqdim etgan tibbiy hujjatlar va tushuntirishlar qo‘mita tomonidan qoniqarli deb topildi.
Yakuniy xulosaga ko‘ra, qozog‘istonlik bokschi tashkilot qoidalarini buzmagan deb e’tirof etildi va unga nisbatan barcha cheklovlar olib tashlandi. Shu tariqa, u o‘z vazn toifasida Xamza Shirazga qarshi majburiy da’vogar maqomini saqlab qoldi.
Vazn toifasidagi holat va Bektemir Meliqo‘ziyevning o‘rni Ushbu vazn toifasida kechayotgan jarayonlar o‘zbekistonlik boks muxlislari uchun ham alohida ahamiyatga ega. Boisi, mazkur divizionda hamyurtimiz Bektemir Meliqo‘ziyev ham o‘z o‘rniga ega.
Hozirgi kunda "Bek Bull" laqabi bilan tanilgan Meliqo‘ziyev Butunjahon boks tashkilotining rasmiy reytingida kuchli o‘ntalikdan joy olgan va ettinchi pog‘onani egallab turibdi. Bu esa uning kelajakda chempionlik kamari uchun asosiy da’vogarlardan biri ekanligini anglatadi.
Xamza Shiraz va Janibek Alimxanuli o‘rtasidagi bo‘lajak jang diviziondagi umumiy vaziyatni oydinlashtiradi. Mazkur to‘qnashuv g‘olibi nafaqat kamarni o‘zida saqlab qoladi yoki qo‘lga kiritadi, balki Bektemir Meliqo‘ziyev kabi yuqori pog‘onalarda borayotgan bokschilarning titul uchun kurashish imkoniyatlarini ham belgilab beradi.
Mutaxassislarning fikricha, ushbu vazn toifasidagi chempionlik poygasi joriy yilda yanada keskin tus olishi kutilmoqda.
