Xitoyning Lightning roboti Useyn Boltning jahon rekordini yangiladi

Pekin shahrida o‘tkazilayotgan nufuzli Butunjahon robotlar konferensiyasi doirasidagi gumanoid robotlar o‘yinlarida olamshumul voqea yuz berdi. Bu haqda One.uz xabar beradi.

Xitoyning Honor kompaniyasi tomonidan yaratilgan Lightning nomli robot 100 metr masofani bor-yo‘g‘i 9,32 soniyada bosib o‘tib, sayyoramizning eng tezkor odami Useyn Boltning 17 yillik rekordini yangiladi. Mazkur ko‘rsatkich sun’iy intellekt va robototexnika jismoniy imkoniyatlar borasida insoniyatdan o‘zib ketayotganini amalda isbotladi.

Lightning roboti uchun bu birinchi rekord emas. Joriy yilning aprel oyida mazkur android Pekin yarim marafonida masofani 50 daqiqa 26 soniyada bosib o‘tgan edi.

Taqqoslash uchun, erkaklar o‘rtasidagi inson rekordi 56 daqiqa 51 soniyani tashkil etadi. Muhandislik nuqtayi nazaridan, bo‘yi 169 santimetr bo‘lgan robotning oyoqlari musobaqa oldidan yana 10 santimetrga uzaytirilgani uning tezlanishiga hal qiluvchi turtki bo‘ldi.

Balandlikka sakrash va shiddatli raqobat Turnirning boshqa yo‘nalishlarida ham insoniyat tarixidagi ko‘rsatkichlar ortda qoldirildi. Xususan, Pekindagi X-Humanoid kompaniyasi roboti tik turgan holda 2,88 metr balandlikka sakrab, Xaver Sotomayorning 1993-yildan buyon saqlanib kelayotgan 2,45 metrlik rekordini yangiladi.

Musobaqada raqobat juda kuchli kechib, boshqa robotlar ham Useyn Boltning natijasidan yaxshiroq ko‘rsatkichlarni qayd etishdi. Tezlanish bo‘yicha ulkan yutuqlarga erishilgan bo‘lsa-da, tormozlanish va muvozanat tizimi muhandislar uchun hamon asosiy muammo bo‘lib qolmoqda.

Marraga katta tezlikda yetib kelgan bir nechta robot sekinlasha olmay, maxsus qo‘yilgan qalin matraslarga borib urildi. Hatto rekordchi Lightning roboti ham marradan so‘ng qattiq yiqilib tushdi va texnik xodimlar yordamida olib chiqib ketildi.

Sport yo‘nalishlari va texnologik sinovlar Pekindagi mazkur olimpiadada mingdan ortiq individual bahslarni o‘z ichiga olgan 51 ta sport yo‘nalishi mavjud. Ular orasida futbol, stol tennisi, og‘ir atletika va arqon tortish kabi turlar bor.

Bu yil dasturga ilk bor robot qo‘llarining nozik harakatlari va teginish orqali sezish qobiliyatini tekshirish sinovlari ham kiritildi. Olimlar inson qo‘lining chaqqonligini metall va datchiklarda to‘liq takrorlashni robototexnika sohasidagi eng qiyin vazifalardan biri deb hisoblashadi.

Shunga qaramay, mazkur musobaqalar texnologiyalar shiddat bilan rivojlanayotganini ko‘rsatmoqda. One.uz nashri ma’lumotlariga ko‘ra, bunday yutuqlar kelajakda robotlarning kundalik hayotimizdagi o‘rnini butunlay o‘zgartirib yuborishi mumkin.