Hindistonlik yosh shaxmatchi Magnus Karlsenni mag'lubiyatga uchratdi
Hindistonlik 15 yoshli shaxmatchi Vandan Alankar Savay jahon shaxmat olamida katta shov-shuvga sabab bo‘lgan natijani qayd etdi. Bu haqda One.uz xabar beradi.
Yosh iqtidor egasi ommabop Chess.com platformasida o‘tkazilgan nufuzli Titled Tuesday blis turniri doirasida dunyoning ko‘p karra chempioni va ayni paytdagi eng kuchli shaxmatchisi Magnus Karlsenni mag‘lubiyatga uchratdi. Mazkur g‘alaba nafaqat natijasi, balki yosh sportchining ushbu muvaffaqiyatga bo‘lgan o‘ta xotirjam munosabati bilan ham ko‘pchilikning e’tiborini tortdi.
Shaxmat afsonasining taslim etilishi Vandan Alankar Savay Titled Tuesday turnirida Magnus Karlsenga qarshi dona surish imkoniyatiga ega bo‘ldi. Yosh shaxmatchi uchun bu shunchaki navbatdagi o‘yin emas, balki dunyoning birinchi raqamli grossmeysteriga qarshi haqiqiy sinov edi.
Shunga qaramay, 15 yoshli o‘smir kuchli hayajonga berilmasdan, o‘ta keskin kechgan bahsda o‘zining strategik mahoratini namoyish etdi. Yakunda u 50-yurishda Karlsenni taslim bo‘lishga majbur qildi va yirik g‘alabani qo‘lga kiritdi.
Ushbu natija shaxmat muxlislari va mutaxassislar orasida tezda tarqaldi, chunki Karlsen ustidan g‘alaba qozonish har qanday tajribali shaxmatchi uchun ham sharafli yutuq hisoblanadi. Ayniqsa, blis yo‘nalishida vaqt juda kam bo‘lishi va har bir soniya qaror qabul qilishda muhim ahamiyat kasb etishi yosh sportchining mahoratidan dalolat beradi.
Kutilmagan xotirjamlik va ota-onaning hayrati Voqeaning eng qiziq tomoni g‘alabadan keyin yuz berdi. Odatda bunday yutuqdan so‘ng yosh sportchilar ijtimoiy tarmoqlarda maqtanishadi yoki yaqinlari bilan bayram qilishadi.
Biroq Vandan butunlay boshqacha yo‘l tutdi. O‘sha kuni u Yevropadagi turnirlardan endigina qaytib kelgani sababli o‘zini juda charchagan his qilayotgan edi.
Turnirda to‘rtta partiya o‘tkazgach, u ota-onasiga shunchaki dam olmoqchi ekanini aytib, xonasiga kirib uxlab qoldi. Oradan bir necha soat o‘tgach, uning ota-onasi o‘g‘lining profilini tekshirib ko‘rishganda, kutilmagan haqiqatga duch kelishdi.
Ular o‘g‘illari jahon shaxmat afsonasini mag‘lub etganini ko‘rib hayratda qolishdi. Vandan esa bu ulkan muvaffaqiyat haqida hech kimga xabar bermagan, hatto ota-onasiga ham alohida ta’kidlab o‘tirmagan edi.
Ushbu xotirjamlik va kamtarlik yosh shaxmatchining kelajakda yanada katta marralarni zabt etishidan dalolat beradi, deb yozadi One.uz nashri.
