Apple kompaniyasi yaqin kelajakda o‘zining an’analarini o‘zgartirib, o‘rta narxli bozorga kirishni rejalashtirmoqda. Bu haqida Zamin.uz xabar berdi.
Rozetked nashrining ma’lumotlariga ko‘ra, kompaniya A18 Pro telefonda ishlatiladigan chip asosida arzon narxdagi MacBook modelini ishlab chiqmoqda. Yangi noutbuk 12,9 dyuymli ekranga ega bo‘ladi va uning narxi taxminan 600–700 dollar atrofida bo‘lishi kutilmoqda.
Bu esa hozirgi kunda mavjud MacBook Air modellari narxidan ancha arzon hisoblanadi, chunki ular kamida 999 dollardan sotila boshlaydi. Ushbu yangi MacBook asosan budjet imkoniyatlari cheklangan foydalanuvchilar uchun mo‘ljallangan.
Mahsulot ta’lim sohasidagi iPad va Chromebook qurilmalari bilan raqobatlashish uchun emas, balki keng omma uchun ishlab chiqilmoqda. Apple so‘nggi o‘n yil ichida bunday arzon narxdagi noutbuk ishlab chiqarmagan.
Arzon MacBook ishlab chiqarish jarayoni Tayvanning Quanta Computer kompaniyasi tomonidan amalga oshiriladi. Ayrim komponentlarni ishlab chiqarish joriy yilning oxirida boshlanadi, to‘liq model esa 2026 yil boshida taqdim etilishi rejalashtirilgan.
Bu yangilik Apple mahsulotlari bozorida yangi segmentni ochishi mumkin.
