Xitoylik olimlar tungi ko‘rish linzasini yaratdi
Xitoylik olimlar inson ko‘zining ko‘rish qobiliyatini kengaytiruvchi yangi infraqizil kontakt linzalar yaratdilar. Bu haqda Zamin.uz xabar berdi.
Bu haqda “Cell” jurnalida chop etilgan tadqiqotda ma’lum qilindi. Yangi linzalar qorong‘uda ham ko‘rish imkonini beradi.
Ilmiy guruh nanozarrachalarni kontakt linzalarga birlashtirib, ilgari ko‘zga ko‘rinmaydigan infraqizil nurlarni ko‘zga ko‘rinadigan yorug‘likka aylantirishga muvaffaq bo‘ldi. Natijada inson 800 dan 1600 nanometrgacha bo‘lgan to‘lqin uzunligidagi nurlarni seza oladi.
Tajriba dastlab sichqonlar ustida o‘tkazildi. Sichqonlar retinasiga nanozarrachalar yuborilgach, ular qorong‘uda harakatlana oldi.
Keyinchalik linzalar inson ko‘zi uchun moslashtirildi. Sinovlarda ishtirok etgan odamlar hatto ko‘zlarini yopsalar ham qorong‘uda yorug‘lik signallarini aniqlay oldi.
Olimlarning fikricha, ushbu linzalar qutqaruv xizmatlari, harbiy amaliyotlar va tungi nazorat sohalarida katta foyda keltirishi mumkin. Linzalar tashqi quvvat manbaiga ehtiyoj sezmaydi va oddiy kontakt linzalarga o‘xshab taqiladi.
Shu bilan birga, tadqiqot hali dastlabki bosqichda hisoblanadi. Linzalar ba’zan tasvirni xiralashtirishi yoki zaif yorug‘lik sharoitida samarali ishlamasligi mumkin.
Shu sababli olimlar texnologiyani yanada rivojlantirish ustida ish olib bormoqda. Mutaxassislar bu kashfiyot inson ko‘rish qobiliyatida yangi davr boshlanishini, yaqin kelajakda tungi ko‘rish linzalari hayotimizda keng qo‘llanilishini ta’kidlamoqda.
