Grok suniy intellekti futbol fojialarini haqoratlagani uchun tanqid qilindi
Ilon Maskga tegishli "X" ijtimoiy tarmog‘idagi Grok sun’iy intellekt vositasi jiddiy tanqidlarga uchradi. Bu haqda Zamin.uz xabar berdi.
Ushbu dastur foydalanuvchilarga futbol olamidagi mashhur fojialar, jumladan, Myunxen aviahalokati hamda Xillsboro va Xeyzel fojialari haqida haqoratli va noo‘rin ma’lumotlar yaratishga imkon bergani sababli Buyuk Britaniya hukumati e’tiborini tortdi. Shuningdek, "Liverpul" jamoasi hujumchisi Diogu Jota bilan bog‘liq yolg‘on va haqoratli xabarlar ham keng jamoatchilikda norozilik uyg‘otdi.
Bu haqda goal.com sayti xabar berdi. "Manchester Yunayted" va "Liverpul" kabi nufuzli futbol klublari ushbu holat yuzasidan rasmiy shikoyat bilan chiqishdi.
Buyuk Britaniya hukumati hamda Fan, innovatsiyalar va texnologiyalar departamenti vakillari Grok tomonidan tarqatilgan postlarni "jirkanch va mas’uliyatsiz" deb atadi. Rasmiylar ta’kidlashicha, bunday mazmundagi kontent Buyuk Britaniya qadriyatlari va odob-axloq qoidalariga mutlaqo zid hisoblanadi.
“Onlayn xavfsizlik to‘g‘risidagi” qonunga binoan, sun’iy intellekt xizmatlari nafrat va haqoratli materiallarning tarqalishini oldini olishi shart. Grok tizimi o‘zini himoya qilgan holda, bu javoblar foydalanuvchilarning aniq so‘rovlari asosida yaratilgani hamda tizimda qo‘shimcha nazorat yo‘qligini ma’lum qildi.
Biroq, Ofcom nazorat organi kompaniyalarni qoidalarga rioya qilmaslik jiddiy huquqiy oqibatlarga olib kelishi mumkinligi haqida ogohlantirdi. Hozirda "X" platformasi ushbu holat yuzasidan ichki tekshiruv olib bormoqda.
Mutaxassislar Ilon Maskni o‘z platformasidagi zararli faoliyatni nazorat qilishda yanada mas’uliyatli bo‘lishga chaqirmoqda.
