Yevropa Ittifoqi noutbuklar uchun yagona quvvatlash ulagichini joriy etadi
Yevropa Ittifoqi noutbuklar uchun yagona quvvatlash ulagichini joriy etish bo‘yicha yangi qoidalarni rasman kengaytirdi. Bu haqda Zamin.uz xabar berdi.
Endilikda ushbu talablar ko‘proq qurilmalarga tatbiq etiladi. 2026-yil 28-apreldan boshlab o‘n olti oylik o‘tish davri yakunlanadi va Yevropa Ittifoqi hududida sotiladigan quvvati yuz vattgacha bo‘lgan barcha yangi noutbuklar USB-C porti orqali quvvat olishi shart deb belgilandi.
Ushbu talab avvalroq smartfon va planshetlar uchun ham joriy qilingan edi. Endilikda noutbuk ishlab chiqaruvchilari nafaqat qurilmani tegishli ulagich bilan jihozlashi, balki xaridorlarga quvvatlash bloki kirmagan to‘plamlarni ham taklif qilishlari lozim.
Yangi qonun quvvatlagichni qutiga solishni butunlay taqiqlamaydi, biroq iste’molchiga o‘z ehtiyojidan kelib chiqib tanlov qilish imkoniyatini berishni talab qiladi. Yangi qoidalar allaqachon sotuvda bo‘lgan, shuningdek, ishlatilgan yoki qayta tiklangan qurilmalarga nisbatan qo‘llanilmaydi.
Bundan tashqari, quvvati yuz vattdan yuqori bo‘lgan yuqori unumdorlikdagi modellar uchun istisno qoldirilgan. Masalan, o‘yin noutbuklari va maxsus ishchi stansiyalar o‘zlarining alohida ulagichlaridan foydalanishda davom etishlari mumkin, biroq ular ham USB-C orqali quvvat olish imkoniyatiga ega bo‘lishi shart.
Yevropa Komissiyasining hisob-kitoblariga ko‘ra, ushbu tartib har yili taxminan on bir ming tonna elektron chiqindi hosil bo‘lishining oldini oladi. Shuningdek, foydalanuvchilar ortiqcha quvvatlash qurilmalarini sotib olmasliklari hisobiga jami yuzlab million yevro mablag‘ni tejab qolishlari kutilmoqda.
Bu chora ham tabiatni asrashga, ham iste’molchilarning xarajatlarini kamaytirishga xizmat qiladi.
