Yirik kompaniyalar sun’iy intellekt o‘rniga mutaxassislarni ishga qaytarmoqda
So‘nggi yillarda ko‘plab nufuzli xalqaro kompaniyalar xarajatlarni tejash va ish samaradorligini oshirish maqsadida o‘z xodimlarini sun’iy intellekt tizimlariga almashtirishga harakat qildi. Bu haqda Zamin.uz xabar berdi.
Biroq amaliyot shuni ko‘rsatmoqdaki, avtomatlashtirish texnologiyalari inson tajribasi va murakkab qarorlar qabul qilish qobiliyati oldida ojiz qolmoqda. CNBC nashri tarqatgan ma’lumotlarga ko‘ra, avvalroq ishchi kuchini qisqartirgan yirik korporatsiyalar endilikda mutaxassislarni ommaviy ravishda ishga qaytarish jarayonini boshladi.
Ushbu tendensiyaning eng yaqqol misollaridan biri sifatida Ford Motor Company korporatsiyasini keltirish mumkin. Sifatni nazorat qilish jarayonlarini to‘liq avtomatlashtirishga uringan mazkur kompaniya kutilgan natijaga erisha olmagach, 350 nafardan ortiq muhandisni nafaqat ishga qaytardi, balki ularning lavozimini ham yuqorilatdi.
Kompaniya rahbariyati hisoblash va tahlil tizimlari murakkab ishlab chiqarish ma’lumotlarini talqin qilishda inson tajribasiga tenglasha olmasligini rasman tan oldi. Ford kompaniyasining avtomobil uskunalari muhandisligi bo‘yicha vitse-prezidenti Charlz Pun ta’kidlashicha, sun’iy intellekt ajoyib yordamchi vosita bo‘lishi mumkin, ammo uning samaradorligi u o‘rganayotgan ma’lumotlar sifati va qo‘llanish sharoitiga bevosita bog‘liqdir.
Inson nazoratisiz texnologiya kutilmagan nosozliklar va noaniqliklarga moyil bo‘lib qolmoqda. Bu esa ishlab chiqarish zanjirida jiddiy xavflarni keltirib chiqaradi.
Mijozlarga xizmat ko‘rsatish va xodimlar bilan ishlash sohasida ham shunga o‘xshash muammolar kuzatildi. Avstraliyaning Commonwealth Bank of Australia moliya muassasasi mijozlarni qo‘llab-quvvatlash xizmati xodimlarini ovozli robotlarga almashtirish natijasida qo‘ng‘iroqlar markaziga tushadigan yuklama keskin ortib ketdi.
Tizim mijozlarning murakkab so‘rovlarini qayta ishlashda xatoliklarga yo‘l qo‘ygan, oqibatda bank operatorlar shtatini zudlik bilan qayta tiklashga majbur bo‘lgan. Texnologiya giganti IBM ham o‘z strategiyasiga o‘zgartirishlar kiritdi.
Kompaniya ma’lum jarayonlarni qisman avtomatlashtirgan bo‘lsa-da, yaqin yillar ichida yangi xodimlarni qabul qilish rejasini e’lon qildi. IBM vakillarining so‘zlariga ko‘ra, etika, vaziyatni xolis baholash va strategik qarorlar qabul qilish bilan bog‘liq vazifalar hamon inson ishtirokini talab qiladi.
Orgvue kadrlar agentligi o‘tkazgan tadqiqot natijalari shuni ko‘rsatdiki, rahbarlarning 39 foizi sun’iy intellekt joriy etilishi sababli xodimlarni qisqartirgan, biroq ularning yarmidan ko‘pi keyinchalik bu qaror xato bo‘lganini tushunib yetgan. Robert Half rekruting firmasi ma’lumotlariga ko‘ra, avtomatlashtirish tufayli tugatilgan ish o‘rinlarining uchdan bir qismi allaqachon qayta tiklangan.
Bugungi kunda sun’iy intellekt infratuzilmasiga milliardlab dollar sarmoya kiritilishiga qaramay, global bozorda texnologiyaning roli qayta ko‘rib chiqilmoqda. Endilikda sun’iy intellekt xodimning o‘rnini bosuvchi kuch emas, balki unga yordam beruvchi vosita sifatida talqin etilmoqda.
Ayniqsa, muloqot, nostandart fikrlash va katta tajriba talab qilinadigan sohalarda inson omili hal qiluvchi ahamiyatga ega bo‘lib qolmoqda.
