«OnePlus» kompaniyasi Yevropa bozorida jiddiy inqirozga yuz tutmoqda
Bir vaqtlar yuqori texnologiyali qurilmalarni arzon narxlarda taklif etib, flagmanlar qotili degan nom qozongan OnePlus kompaniyasi bugungi kunda Yevropa bozorida jiddiy inqirozga yuz tutmoqda. Bu haqda Zamin.uz xabar berdi.
So‘nggi oylarda Yevropa Ittifoqi mamlakatlaridagi foydalanuvchilar tomonidan qurilmalarga kafolatli xizmat ko‘rsatish sifati keskin pasayib ketgani haqida ko‘plab e’tirozlar bildirilmoqda. Xususan, servis markazlari o‘z zimmasidagi majburiyatlarni bajarishdan bosh tortayotgani va mijozlarga nisbatan e’tiborsizlik ko‘rsatilayotgani ommaviy noroziliklarga sabab bo‘lmoqda.
Reddit ijtimoiy tarmog‘idagi foydalanuvchilarning xabarlariga ko‘ra, vaziyat shunchalik murakkablashganki, ko‘pchilik iste’molchilar o‘z huquqlarini himoya qilish uchun maxsus markazlarga murojaat qilishga majbur bo‘lishmoqda. Kompaniya buzilgan yoki nuqsoni bor qurilmalarni ta’mirlash o‘rniga turli bahonalar bilan rad javobini berayotgani brendning mintaqadagi kelajagini so‘roq ostida qoldirmoqda.
Eng asosiysi, mijozlarga ta’mirlash xizmati o‘rniga amalda foydalanish qiyin bo‘lgan chegirma vaucherlari taklif etilmoqda. Masalan, foydalanuvchilardan biri o‘zining simsiz quloqchinlarini kafolat bo‘yicha ta’mirlashga topshirganida, kompaniya ushbu modelni ishlab chiqarish to‘xtatilganini vaj qilib, uni almashtirishdan bosh tortgan.
Buning o‘rniga mijozga rasmiy do‘kondan xarid qilish uchun ma’lum miqdordagi pul vaucheri berilgan. Shunga o‘xshash holatlar quvvatlash qurilmalari va boshqa aksessuarlar bilan ham takrorlanmoqda.
Biroq, bu vaucherlarni ishlatishning deyarli imkoni yo‘q, chunki onlayn do‘konlarda ko‘plab mahsulotlar sotuvda mavjud emas yoki mavjud tovarlarga chegirmalar qo‘llangani sababli kuponlar qabul qilinmaydi. Tahlilchilarning fikricha, bunday tizimli muammolar OnePlus brendining Yevropa bozoridan butunlay chiqib ketishga tayyorgarlik ko‘rayotganidan dalolat berishi mumkin.
Mahsulotlar turining kamayishi, dasturiy ta’minotning boshqa platformaga o‘tkazilishi va xizmat ko‘rsatish markazlarining yopilishi bunga bilvosita isbot bo‘la oladi. O‘zbekiston bozorida ushbu brend qurilmalari asosan norasmiy yo‘llar bilan kirib kelishini inobatga olsak, global miqyosdagi ushbu salbiy o‘zgarishlar mahalliy xaridorlar uchun ham jiddiy ogohlantirishdir.
Agar yirik bozorlarda ehtiyot qismlar yetkazib berish to‘xtatilsa, bu butun dunyoda ushbu smartfonlarni ta’mirlash imkoniyatini cheklab qo‘yadi. Hozircha kompaniya rahbariyati ushbu vaziyat yuzasidan jimlik saqlamoqda.
