Apple yangi qurilmalar uchun buyurtma berish tartibini o'zgartiradi
Apple kompaniyasi navbatdagi qurilmalarini sotuvga chiqarish va oldindan buyurtma berish tartibiga o‘zgartirish kiritishni rejalashtirmoqda. Bu haqda One.uz xabar beradi.
Xabarlarga ko‘ra, 2026-yilda kutilayotgan yangi avlod smartfonlari va aqlli soatlari uchun buyurtmalar qabul qilish an’anaviy juma kunidan shanba kuniga ko‘chirilishi mumkin. Ushbu qaror AQShdagi muhim sanalar bilan bog‘liq bo‘lib, kompaniyaning global savdo siyosatiga ham o‘z ta’sirini o‘tkazadi.
Mazkur o‘zgarish nafaqat sanani, balki buyurtmalar boshlanadigan aniq vaqtni ham qamrab olishi kutilmoqda. Sana o‘zgarishining asosiy sababi Apple kompaniyasining yirik taqdimoti 2026-yilning 9-sentabr kuniga mo‘ljallangan.
Ushbu tadbirda iPhone 18 Pro flagmani, kompaniya tarixidagi ilk buklama dizayndagi smartfon hamda yangi avlod aqlli soatlari namoyish etilishi kutilmoqda. Odatda yangi mahsulotlar taqdim etilgan haftaning juma kuni buyurtmalar uchun ochiq deb e’lon qilinardi.
Biroq 2026-yilda ushbu juma kuni 11-sentabrga to‘g‘ri kelmoqda. AQSh va jahon hamjamiyati uchun motam kuni hisoblangan 11-sentabrda yirik tijoriy tadbirlarni amalga oshirish kompaniya odob-axloq qoidalariga zid keladi.
Shu sababli, Apple rahbariyati ehtirom yuzasidan savdo boshlanishini bir kunga surishni rejalashtirmoqda. Bunday holat kompaniya tarixida avval ham kuzatilgan.
Masalan, 2015-yilda ham juma kuni motam sanasiga to‘g‘ri kelgani bois, o‘sha davrdagi yangi modellar uchun buyurtmalar shanba, 12-sentabr kuni boshlangan edi. Vaqt va yetkazib berishdagi yangiliklar Faqat sana emas, balki buyurtma berish boshlanadigan soat ham o‘zgarishi mumkin.
Avvalgi yillarda jarayon Tinch okeani vaqti bilan tonggi soat 05:00 da boshlangan bo‘lsa, bu safar tungi soat 00:00 dan e’tiboran buyurtmalar qabul qilinishi aytilmoqda. Bu esa turli mintaqalardagi foydalanuvchilar uchun vaqtni to‘g‘ri rejalashtirish zaruratini tug‘diradi.
Shuni ham ta’kidlash joizki, barcha yangi qurilmalar bir vaqtda sotuvga chiqmasligi mumkin. iPhone 18 Pro va asosiy aqlli soatlar sentabr oyi o‘rtalarida xaridorlarga havola etilsa, kompaniyaning birinchi buklama smartfoni ishlab chiqarish jarayonidagi murakkabliklar sababli sentabr oyi oxirlariga qolishi taxmin qilinmoqda.
Apple ushbu o‘zgarishlar bo‘yicha aniq ma’lumotlarni taqdimot kuni e’lon qiladi.
