Google Pixel 6a batareya muammosi uchun kompensatsiya beradi

Google kompaniyasi Pixel 6a smartfonlari egalariga batareya nosozliklari uchun kompensatsiya to‘lashni ma’lum qildi. Bu haqida Rozetked.me xabar berdi. 

Ushbu muammo asosan batareyaning haddan tashqari qizishi, shishishi, o‘z-o‘zidan o‘chib qolishi va boshqa shunga o‘xshash holatlarni o‘z ichiga oladi. Kompensatsiya dasturi AQSh foydalanuvchilari uchun mo‘ljallangan bo‘lib, u ixtiloflarni hal qilish doirasida amalga oshirilmoqda.

Maksimal to‘lov miqdori 150 dollarni tashkil etadi, eng kam miqdor esa 25 dollarni tashkil etadi. To‘lov summasi nosozlik darajasiga va taqdim etilgan hujjatlarga bog‘liq.

Ariza berish uchun smartfonning o‘zi talab qilinmaydi, faqat qurilmani egallaganlikni tasdiqlovchi hujjat — masalan, chek, seriya raqami yoki xarid qilish bo‘yicha buyurtma kerak bo‘ladi. Arizalarni topshirish 2025 yil 28 iyungacha maxsus sahifa orqali amalga oshirilishi mumkin edi.

Kompensatsiya mablag‘lari ma’lumotlar tekshirilgach, to‘g‘ridan-to‘g‘ri foydalanuvchilarga o‘tkaziladi. Ushbu da’vo faqat Pixel 6a modelini emas, balki Pixel oilasidagi boshqa qurilmalarni ham qamrab oladi, ammo aynan 6a modellarda batareya bilan bog‘liq muammolar ko‘proq aniqlangan.

Google kompaniyasi o‘z aybini tan olmaydi, ammo sud jarayonisiz kompensatsiyalarni to‘lashga rozi bo‘lgan. Bu qadam kompaniya va foydalanuvchilar o‘rtasidagi nizolarni tinch yo‘l bilan hal qilishga xizmat qiladi.