AQSH «Polestar»ni mamlakatda sotishni taqiqladi
AQSH hukumati milliy xavfsizlikni ta’minlash doirasida qabul qilingan yangi qoidalarga asosan Polestar brendining mamlakat hududida yangi avtomobillar sotishga taqiq qo‘yildi. Bu haqda Zamin.uz xabar berdi.
Ushbu qaror 2027-yilgi model yili yakunidan so‘ng kuchga kiradi. AQSH Savdo vazirligi kompaniyaning Amerika bozorida faoliyatini davom ettirish uchun so‘ragan maxsus ruxsatnomasini rad etdi, bu esa brendning ushbu yirik mintaqadagi kelajagini so‘roq ostida qoldirdi.
Taqiqning asosiy sababi Polestar kompaniyasining mulkiy tuzilmasi bilan bog‘liq. Ma’lumki, brendning nazorat paketi Xitoyning Geely avtokonserniga tegishli.
AQSHning yangi ulangan transport vositalari qoidasi talablariga ko‘ra, Xitoy va Rossiyada ishlab chiqarilgan dasturiy ta’minot yoki elektron komponentlarga ega avtomobillarning savdosi cheklanadi. Vashington bu texnologiyalar josuslik yoki kiberhujumlar uchun ishlatilishi mumkinligidan xavotirda.
Yangi tartibga ko‘ra, aloqa va tarmoqqa ulanish funksiyalariga javob beradigan dasturiy ta’minotga nisbatan cheklovlar 2027-yilgi modellardan boshlab amal qiladi. Apparat qismi bo‘yicha cheklovlar esa 2030-yildan kuchga kirishi belgilangan.
Polestar ushbu qoidalardan mustasno bo‘lishga harakat qildi, biroq rasmiy idoralar brendning Xitoy bilan aloqalarini o‘ta yuqori xavf deb baholadi. Qizig‘i shundaki, Geely tarkibiga kiruvchi boshqa bir brend Volvo avvalroq bunday ruxsatnomani olishga muvaffaq bo‘lgan edi.
Ushbu vaziyat AQSHda Xitoyda yig‘ilgan avtomobillarni sotayotgan Lincoln va Buick kabi mahalliy brendlar uchun ham jiddiy ogohlantirish hisoblanadi. Ular ham yaqin orada shunga o‘xshash tekshiruvlardan o‘tishi talab etiladi.
Polestar uchun vaziyatni murakkablashtiradigan jihat shundaki, brendning Polestar 3 modeli aynan AQSHning Janubiy Karolina shtatidagi zavodda ishlab chiqariladi. Hozircha mahalliy ishlab chiqarishning taqiqdan keyingi taqdiri noaniq bo‘lib qolmoqda.
Polestar rahbariyati AQSH hukumatining qaroriga e’tiroz bildirmaslikka qaror qildi. Kompaniya bosh direktori brend strategiyasi allaqachon boshqa mintaqalarga yo‘naltirilganini ma’lum qildi.
Uning so‘zlariga ko‘ra, 2026-yilning birinchi choragi holatiga ko‘ra, Polestar global savdosining qariyb 94 foizi AQSHdan tashqaridagi bozorlar hissasiga to‘g‘ri kelgan. Bu esa kompaniyaning Amerika bozoridan chiqib ketishi uning umumiy moliyaviy holatiga halokatli zarba bermasligidan dalolat beradi.
Kompaniya kelajakdagi asosiy rivojlanish yo‘nalishlari sifatida quyidagi hududlarni belgilab oldi. Birinchi o‘rinda Yevropa Ittifoqi mamlakatlari mavjud, bu yerda yangi Polestar 7 modelini chiqarish rejalashtirilgan.
Ikkinchidan, Janubi-sharqiy Osiyo davlatalari ko‘zda tutilgan. Uchinchidan, Sharqiy Yevropa va Lotin Amerikasi bozorlari o‘rin olgan.
To‘rtinchidan, Kanada bozori ham strategik yo‘nalish sifatida belgilangan. AQSHdagi mavjud mijozlar uchun xushxabar shundaki, allaqachon sotilgan yoki mamlakatga olib kirilgan avtomobollar saqlab qolinadi va ularning foydalanishi uchun taqiq qo‘yilmaydi.
Polestar kompaniyasi bozor strategiyasini qayta ko‘rib chiqish davomida mijozlariga va hamkorlariga ishonch va sifatli xizmatni davom ettirishni ma’lum qilgan.
