AQSHda steyblkoinlarni nazorat qilish qonuni qabul qilindi
Amerika Qo‘shma Shtatlarida kripto bozorida muhim o‘zgarish yuz berdi. Bu haqida Zamin.uz xabar berdi.
Prezident Donald Tramp mamlakatda steyblkoinlar sohasida yangi qonunni – “GENIUS” qonunini imzoladi. Bu hujjat raqamli moliya tizimini tubdan o‘zgartirishga qaratilgan va AQSH dollarining jahon moliya bozoridagi mavqeini mustahkamlashga xizmat qiladi.
Yangi qonunga ko‘ra, steyblkoinlar, ya’ni qiymati AQSH dollari yoki davlat obligatsiyalariga bog‘langan kriptovalyutalar, endi federal nazoratga olinadi. Steyblkoin chiqaruvchilari o‘z zaxiralarini har oy oshkora e’lon qilishlari shartligi belgilandi.
Oq uy bayonotiga ko‘ra, “GENIUS” qonuni davlat qarziga bo‘lgan talabni oshirish va dollarning xalqaro moliya tizimidagi o‘rnini yanada mustahkamlashga xizmat qiladi. Qonunni imzolash marosimida yirik texnologiya va kriptovalyuta kompaniyalari rahbarlari ishtirok etdi.
Prezident Tramp bu islohotni tarixiy deb atadi va u birinchi federal steyblkoinlarni tartibga soluvchi tizim ekanini ta’kidladi. Endi davlat mansabdorlari ham steyblkoinlarni qonuniy ravishda sotib olish va ulardan foydalanish imkoniyatiga ega bo‘ladi.
Qonun loyihasi Kongressda ikki partiya tomonidan qo‘llab-quvvatlandi. Demokratlar amaldorlar va ularning oila a’zolariga steyblkoin biznesida ishtirokni cheklashni taklif qilgan bo‘lsa-da, bu band qabul qilinmadi.
Mutaxassislar fikricha, yangi qonun dollar bilan bog‘langan raqamli valyutalar uchun qulay sharoit yaratadi va AQSH kripto bozorini jahon miqyosida raqobatbardosh qiladi. Hozirgi steyblkoin bozori 260 milliard dollardan oshgan bo‘lib, 2028 yilga kelib bu ko‘rsatkich 2 trillion dollargacha yetishi mumkin.
Ekspertlar va iqtisodchilar “GENIUS” qonuni AQSH moliyasi va texnologik rivojlanishida yangi davr boshlashini ta’kidlamoqda. Ushbu qonun orqali Amerika raqamli aktivlar bozorida yetakchilik pozitsiyasini mustahkamlashi kutilmoqda.
