Xitoyda birinchi barbekyu ta’lim instituti ochildi

Xitoyning Xunan viloyatidagi Yueyan shahrida mamlakat tarixida birinchi marta shashlik sanoatiga ixtisoslashgan ta’lim muassasasi ochiladi. Bu haqida Zamin.uz xabar berdi.

Yangi Barbekyu instituti Yueyan ochiq universiteti va shahar Barbekyu assotsiatsiyasining hamkorligida, shahar hokimiyati ko‘magida tashkil etiladi. Mahalliy nashrlarga ko‘ra, ushbu ta’lim muassasasi barbekyu sohasini malakali mutaxassislar orqali rivojlantirish, yangi ish o‘rinlarini yaratish hamda hudud iqtisodiyotini mustahkamlash maqsadida ochilmoqda.

Yueyan ochiq universiteti partiya kotibi Yue Yanxua institut faoliyati doirasida mamlakatdagi barbekyu do‘konlari faqat ovqatlanish joylari emas, balki yaxlit va mukammal iqtisodiy zanjirga aylanishini ta’kidlagan. Bugungi kunda Yueyan shahrida 2000 dan ortiq barbekyu do‘konlari faoliyat yuritmoqda va ularda taxminan 50 ming kishi doimiy ish bilan ta’minlangan.

Sohada yillik moliyaviy aylanma 2 milliard yuanga, ya’ni taxminan 280 million dollarga teng. Yueyan ochiq universiteti vitse-prezidenti Szyan Szunfuning so‘zlariga ko‘ra, yangi institut mahalliy yoshlar uchun ish o‘rinlari yaratishda muhim rol o‘ynaydi.

Maktab va universitet bitiruvchilari orasida ish topish qiyinchiliklari mavjud bo‘lib, barbekyu sohasi esa kam sarmoya bilan boshlash mumkin bo‘lgan va yuqori daromad keltiradigan yo‘nalish hisoblanadi. Ushbu tashabbus Xitoyda kasbiy ta’limga yangi yondashuv sifatida qabul qilinmoqda.

Barbekyu endi faqat ovqat emas, balki zamonaviy iqtisodiyotning muhim qismiga aylanmoqda.