AQShda chiqindi yig‘ish ishchilari ish tashladi
AQShning turli shaharlarida yoz faslida chiqindilar yig‘ilmay qolishi jiddiy muammoga aylangan. Bu haqida Zamin.uz xabar berdi.
Bu holat xususiy chiqindi tashish kompaniyasi Republic Services ishchilarining ish tashlashlari natijasida yuzaga kelmoqda. Ishchilar o‘z mehnat haqi va ijtimoiy ta’minot shartlaridan norozilik bildiradi.
Natijada millionlab amerikaliklar chiqindi muammosi bilan duch kelmoqda. Ish tashlashlar butun mamlakat bo‘ylab tarqaldi.
1-iyul kuni Boston yaqinidagi 14 ta shaharni qamrab olgan Teamsters Local 25 kasaba uyushmasi chiqindi xodimlari ish tashlashni boshladi. Keyinchalik bu harakat Kaliforniya, Illinoys, Jorjiya va Vashington shtatlarigacha kengaydi.
Ayrim shaharlar bilan kelishuvga erishilgan bo‘lsa-da, ko‘plab hududlarda muammo hal etilmagan. Malden shahridan bo‘lgan 17 yillik tajribaga ega haydovchi Mayk Ortis ish haqi pastligini ta’kidlab, "Ular taklif qilayotgan maosh bilan bir oy ham yashab bo‘lmaydi", deydi.
Ish tashlagan xodimlarning umumiy soni 2000 nafardan oshgan. Ular uskunalarning nosozligi, gigiyena sharoitlarining yomonligi hamda xavfli mehnat muhitidan norozi.
Republic Services kompaniyasi ish tashlashlar davomida kasaba uyushmasini noqonuniy harakatlarda aybladi. Shinalarni teshib chiqish, kimyoviy moddalar sepish, haydovchilarga tajovuz qilish kabi da’volar bildirildi.
Biroq Teamsters bu ayblovlarni rad etmoqda. Mutaxassislarning fikricha, chiqindilarning ochiq joylarda to‘planib qolishi, ayniqsa yoz oylarida, sog‘liq va gigiyenaga salbiy ta’sir ko‘rsatadi.
Bu esa ishchilar foydasiga jamoatchilik bosimini oshiradi. Masalan, Filadelfiyada ishchilar ish tashlaganida atigi sakkiz kun ichida kelishuvga erishilgan.
Ba’zi shaharlar muqobil chiqindi yig‘ish punktlarini tashkil qildi, ayrim joylarda esa boshqa xususiy kompaniyalar bilan vaqtinchalik shartnomalar tuzildi. Ammo bu chora-tadbirlar byudjetga qo‘shimcha xarajatlarni keltirib chiqaradi.
Shu sababli muammoga doimiy yechim topish uchun muzokaralar davom ettirilmoqda.
