Tailand va Kambodja muzokaralarda o‘t ochishni to‘xtatdi
Tailand va Kambodja rahbarlari o‘limga sabab bo‘lgan chegara to‘qnashuvini tugatish maqsadida Malayziyada muzokaralar o‘tkazishga kelishib oldi. Bu haqida Zamin.uz xabar berdi.
Ushbu qaror AQSh prezidenti Donald Trampning bosimi ostida qabul qilindi. To‘rt kun davom etgan mojaro natijasida kamida 34 kishi halok bo‘ldi, 168 mingdan ortiq odam xavfsiz hududlarga ko‘chirilgan.
Tailand bosh vaziri devoni vakili Jirayu Huangsapga ko‘ra, bosh vazir vazifasini bajaruvchi Fumtam Vechayachai Malayziya bosh vaziri Anvar Ibrohim taklifiga binoan muzokaralarda ishtirok etadi. Kambodja rahbari Hun Manet ham ushbu muzokaralarda qatnashishi kutilmoqda.
Shanba kuni Donald Tramp ikki davlat rahbarlariga agar mojaroni tugatmasa, savdo bitimlarini to‘xtatishini bildirgan. Keyinchalik u har ikki tomon muzokaraga rozilik berganini e’lon qildi.
Kambodja rahbari Hun Manet mamlakati “darhol va shartsiz” o‘t ochishni to‘xtatishga tayyorligini ma’lum qildi. Tailand esa ehtiyotkorlik bilan yondashib, muzokaralarga chin dildan kirishish lozimligini ta’kidladi.
To‘qnashuvlar payshanba kuni portlagan mina sabab boshlangan bo‘lib, tomonlar bir-birini ayblamoqda. Mojaroda hozirgacha 21 nafar tailandlik va 13 nafar kambodjalik halok bo‘lgan.
Evakuatsiya qilinganlar orasida ayollar, bolalar va hatto chorva mollari ham bor.
