Xitoylik muhojirlar AQShda erkinlik uchun kurashmoqda

So‘nggi yillarda minglab xitoyliklar erkinlik orzusida xavfli yo‘llar orqali Amerika Qo‘shma Shtatlariga yo‘l olishdi. Bu haqida Zamin.uz xabar berdi.

Ular orasida Pan ismli erkak ham bor. U Xitoyda uyi talon-taroj qilinib, mamlakatni tark etishga qaror qilgan.

Pan Ekvador orqali AQShga kirib, hozirda Kaliforniyada restoran oshpazi sifatida faoliyat yuritmoqda. Pan va boshqa ko‘plab muhojirlar ish topgan bo‘lsalar-da, ular til bilmaslik, ijtimoiy ajralish va huquqiy noaniqlik kabi muammolarga duch kelmoqda.

Shunga qaramay, ular hayotlarini kamtarona bo‘lsa-da, erkin deb hisoblaydi. Afsuski, Donald Trampning ma’muriyatga qaytishi bu umidlarni so‘ndirmoqda.

Trampning immigratsion reydlari, noqonuniy muhojirlarni deportatsiya qilish siyosati va AQSh bilan Xitoy o‘rtasidagi munosabatlarning sovuqlashuvi muhojirlar orasida tushkunlikni kuchaytirmoqda. Ko‘pgina xitoylik muhojirlar hali rasmiy boshpana maqomini olmagan.

Ba’zilari esa shu maqomga ega bo‘lishiga qaramay, reydlar vaqtida hibsga olinmoqda. Pan shunday deydi: “Agar meni chiqarib yuborishsa, Xitoyga qaytishga majbur bo‘laman.

Bu fikrning o‘zi juda og‘riqli.” Shunga qaramay, u qarorini o‘zgartirmasligini aytadi: “Men qolaman. Bu yerda men erkindirman.”