Xitoyning Xenan viloyatida yashovchi 18 yoshli Szyan Chennan ismli qiz universitetga qabul qilingani haqidagi xabarni eshitgach, murakkab tibbiy holat — koma davridan chiqdi. Bu haqida Zamin.uz xabar berdi.
Bu voqea nafaqat uning oilasini, balki butun Xitoy ommaviy axborot vositalarini hayratda qoldirdi. Szyan Chennan joriy yilning 11 iyulida mamlakatdagi eng muhim imtihon — gaokao (o‘qishga kirish milliy testi) ni topshirganidan keyin yurak muammolari va isitma sabab shifoxonaga yotqizildi.
Unda fulminant miokardit — yurak mushagining tezkor yallig‘lanishi tashxisi qo‘yildi. Bu kasallik hayot uchun xavfli hisoblanadi.
Qizni boshqa shifoxonaga ko‘chirishganida u koma holatiga tushib qoldi. Qizning opasi aytishicha, oilalari uzoq vaqtdan beri moliyaviy qiyinchiliklarga duch kelmoqda.
Otasi 2023 yilda avtohalokatdan keyin faqat tayoq yordamida yuradi. Onasi esa kundalik tirikchilik uchun ko‘cha chetida taom sotadi.
Oilada yana bir o‘g‘il bola bor, u hozirda o‘rta maktabda o‘qimoqda. Szyanning davolanishi uchun sarflangan mablag‘ 200 ming yuan, ya’ni taxminan 2,2 milliard so‘mdan oshib ketdi.
Qiz sakkiz kun komada yotgan paytda otasi universitetga qabul qilinganligi haqidagi maktubni oldi. U bu quvonchli xabarni shifoxonaga olib kirib, qiziga umid va qo‘rquv aralash ovozda dedi: “Biz hammamiz juda xursandmiz, sen universitetga kirding!” Shu zahoti qizning ko‘z qovoqlari qimirlaganini ko‘rdi.
Ertasi kuni Szyan Chennan komadan chiqdi. Shifokorlar uni ota-onasi bilan videoqo‘ng‘iroq orqali bog‘lashdi.
Qiz barmoqlari bilan “ok” ishorasini berdi, bu esa hayotga qaytish, umid va orzularning belgisi sifatida qabul qilindi. Ota jurnalistlarga bergan intervyusida shunday dedi: “Moliyaviy ahvolimiz og‘ir bo‘lsa-da, men uni albatta universitetga jo‘nataman.
Bu uning hayotiy orzusi.” Bu voqea ko‘pchilikka saboq bo‘lib, umid va irodaning kuchini yana bir bor isbotladi.
