Yevropa davlatlari va Ukraina rasmiylari Amerika Qo‘shma Shtatlari hukumatiga Rossiya va Ukraina o‘rtasidagi qurolli mojaroni yakunlashga qaratilgan rejani taqdim etdi. Bu haqida Zamin.uz xabar berdi.
The Wall Street Journal nashrining manbalariga ko‘ra, Kiyev va Yevropa mamlakatlari tomonlari o‘t ochishni to‘xtatishni birinchi qadam sifatida ko‘rishni taklif qilmoqda. Ular hududiy masalalardagi almashinuv faqat o‘zaro kelishuv asosida amalga oshirilishi kerakligini ta’kidlaydi.
Agar Ukraina ayrim hududlardan chiqishga rozi bo‘lsa, Rossiya ham o‘z nazoratidagi hududlardan chiqishi shartligi bildirildi. Rejaga ko‘ra, agar Ukraina hududiy imtiyozlar yoki yon berishlarga rozilik bildirsa, unga qat’iy xavfsizlik kafolatlari beriladi.
Bu kafolatlar ichida mamlakatning NATOga a’zo bo‘lishi ehtimoli ham ko‘zda tutilgan. Yevropa yetakchilari yordamchilari mazkur rejani 9 avgust kuni Buyuk Britaniyada o‘tkazilgan muzokaralar chog‘ida AQSH vakillariga taqdim etdi.
Muzokaralarda AQSH vitse-prezidenti Jeyms Vens, davlat kotibi Marko Rubio, shuningdek, prezidentning maxsus vakillari Kit Kellog va Stiven Uitkoff ishtirok etdi. Nashr xabariga ko‘ra, Yevropa va Ukraina vakillari hujjatda Rossiya bilan muzokaralarda inobatga olinishi zarur bo‘lgan “qizil chiziqlar”ni belgilab bergan.
Ularning fikricha, Ukraina taqdiri faqat Ukraina ishtirokida muhokama qilinishi lozim. Shuningdek, Rossiya va AQSH o‘rtasida erishilgan kelishuvlar Yevropa davlatlari ishtirokisiz ahamiyatini yo‘qotishi mumkin.
Bu haqda Yevropaning yuqori martabali rasmiysi ma’lum qilgan. Avvalroq, AQSH tomonidan ishlab chiqilgan urushni to‘xtatish rejasi Rossiya prezidenti Vladimir Putinga ham yetkazilgani xabar qilingan edi.
WSJ ma’lumotlariga ko‘ra, Putin Ukrainadan Donetsk viloyatini to‘liq Rossiya tarkibiga o‘tkazishni talab qilgan. Shundan so‘ng Rossiya Zaporoje va Xerson viloyatlarida front chizig‘ini “muzlatish”ni taklif qilgan.
Ukraina prezidenti Vladimir Zelenskiy 9 avgustdagi bayonotida mamlakat Rossiyaga hududlarini bermasligini qat’iy ta’kidladi. Uning so‘zlariga ko‘ra, Ukraina hech qachon bosqinchi qo‘liga o‘z hududlarini topshirmaydi.
