Rossiyalik yoshlar oyiga 200 ming rubl maoshni maqsad qilmoqda

Rossiyada 18 yoshdan 35 yoshgacha bo‘lgan yoshlarning uchdan biri kasbiy faoliyatining eng yuqori bosqichida oyiga kamida 200 ming rubl daromad olishni maqsad qilmoqda. Bu haqida Zamin.uz xabar berdi.

Peopletalk nashri ma’lumotlariga ko‘ra, tahlilchilar qo‘shma so‘rov natijalariga asoslanib, shunday xulosaga kelishgan. So‘rovda qatnashganlarning 28 foizi oylik maoshini 400 mingdan 500 ming rublgacha yetkazishni orzu qiladi.

24 foiz respondent uchun qulay daromad miqdori 100 ming rubl atrofida bo‘lsa, 16 foizi esa 300 ming rubldan yuqori maoshni ko‘zlaydi. Kasbiy cho‘qqiga erishish yoshi borasida fikrlar bo‘linadi: 44 foiz ishtirokchilar bunga 36 dan 40 yoshgacha bo‘lgan davrni eng samarali deb biladi, 38 foiz esa 30 dan 35 yoshgacha bo‘lgan yillarni kasbiy yuksalishning eng yuqori bosqichi deb hisoblaydi.

Qolgan 18 foiz esa bu yosh oralig‘ini 40 dan 50 yoshgacha deb ko‘radi. Hozirgi daromad darajalari ham farq qiladi: yosh rossiyaliklarning 27 foizi oyiga 50 ming rublgacha, 22 foizi 51 mingdan 81 ming rublgacha, 24 foizi 81 mingdan 101 ming rublgacha, yana 27 foizi esa 101 ming rubldan yuqori maosh oladi.

So‘rov natijalari shuni ko‘rsatadiki, ko‘pchilik moliyaviy zaxira to‘plashni boshlagan. Jamg‘arma qilishning asosiy usullari bank omonatlari, aksiya va obligatsiyalarga sarmoya kiritishdir.

Kam hollarda hayot sug‘urtasi, ko‘chmas mulk yoki oltinga investitsiya qilinadi. Jamg‘armaning asosiy maqsadlari uy xaridi va kelajakdagi pensiyani ta’minlashdir.

Ushbu tadqiqot 2025 yil avgust oyida Rossiya bo‘ylab 18 yoshdan 35 yoshgacha bo‘lgan 2300 dan ortiq iqtisodiy faol yoshlar orasida o‘tkazilgan. Shu bilan birga, Rossiyada o‘rtacha ish haqi oshishda davom etmoqda.

Rosstat ma’lumotlariga ko‘ra, 2025 yil may oyida o‘rtacha oylik maosh 99 422 rublni tashkil etib, o‘tgan yilning shu davriga nisbatan 14,5 foizga oshgan. Ayrim sohalarda esa xodimlar maoshi bu ko‘rsatkichdan ikki-uch baravar yuqori bo‘lmoqda.