Janubiy Koreyada it go‘shti yetishtirish bilan shug‘ullanuvchi fermalarning ko‘pchiligi faoliyatini to‘xtatmoqda. Bu haqida Zamin.uz xabar berdi.
Bu jarayon mamlakatda bir yil oldin qabul qilingan maxsus qonun asosida amalga oshirilmoqda. Qishloq xo‘jaligi vazirligining ma’lumotlariga ko‘ra, 2024 yil avgustidan beri 1537 ta it go‘shti fermasining 1072 tasi yopilgan, ya’ni bu fermalarning 70 foizi faoliyatini to‘xtatgan.
Yopilgan fermalarda jami 346 ming bosh it boqilgan bo‘lib, bu mamlakatdagi itlarning 74 foizini tashkil etadi. Rasmiylar 2025 yil oxirigacha it go‘shti fermalarining kamida 75 foizi faoliyatdan to‘xtashini taxmin qilmoqda.
Vazirlik vakilining ta’kidlashicha, bu ko‘rsatkich kutilganidan yuqori bo‘lib, jamoatchilikning it go‘shtini iste’mol qilishni taqiqlashni avlodlar oldidagi mas’uliyat deb qabul qilishi hamda hukumatning moliyaviy yordamlari bunga ta’sir ko‘rsatmoqda. Qonunga ko‘ra, itlarni ko‘paytirish, so‘yish, tarqatish hamda go‘sht maqsadida sotish qat’iyan taqiqlangan.
Bundan tashqari, ushbu sohada ishlaganlarga kasbini o‘zgartirish uchun davlat tomonidan subsidiyalar beriladi. 2027 yildan boshlab, uch yillik o‘tish davri tugagach, qonunni buzganlarga ikki yilgacha ozodlikdan mahrum qilish yoki 30 million von miqdorida jarima solinishi mumkin.
2024 yilda Janubiy Koreya Milliy Assambleyasi it go‘shti iste’molini taqiqlovchi qonunni qabul qilgan edi. O‘sha paytda aholining 90 foizi it go‘shti iste’mol qilishni ma’qullamaganini bildirgan.
Shu tariqa, mamlakatda it go‘shti fermalari bosqichma-bosqich yo‘qolib bormoqda, bu esa Janubiy Koreya jamiyatining yangi qadriyatlar sari intilayotganidan dalolat beradi.
