Dubayda 25 millionlik pushti olmos o‘g‘irlandi
Dubayda politsiya qiymati 25 million dollar bo‘lgan noyob pushti olmosning o‘g‘irlanishini aniqladi. Bu haqida Zamin.uz xabar berdi.
Hodisa yuzasidan o‘tkazilgan qidiruv ishlari davomida jinoiy guruhning uch nafar a’zosi qo‘lga olindi. Olmos egasi uni Yevropadan Birlashgan Arab Amirliklariga sotish maqsadida olib kelgan edi.
Jinoyatchilar o‘g‘irlikni bir yildan ortiq vaqt davomida rejalashtirib, o‘zlarini badavlat xaridorlar uchun vositachi sifatida ko‘rsatishgan. Ular badavlat kishilarda yaxshi taassurot qoldirish uchun qimmatbaho avtomobillarni ijaraga olib, hashamatli mehmonxonalarda uchrashuvlar tashkil etishgan.
Jinoyatchilar olmos egasini villaga chaqirib, toshni o‘g‘irlab ketganlar. Dubay politsiyasi tezkor guruh tuzib, zamonaviy texnologiyalar va sun’iy intellekt yordamida 8 soat ichida gumondorlarning joylashuvini aniqladi va ularni hibsga oldi.
Olmos topilib, jinoyatchilar uni kichik muzlatgichga yashirib, mamlakatdan olib chiqishni rejalashtirganlari ma’lum bo‘ldi. Mazkur holat Dubay politsiyasining samarali ishlashi va ilg‘or usullarni qo‘llashi natijasida tezda hal etildi.
