Germaniyada yomg‘ir suvini o‘g‘irlash jinoyat hisoblanadi
Germaniyada yomg‘ir suvini ruxsatsiz olib ketgan ayol jinoiy javobgarlikka tortilishi mumkin. Bu haqida Zamin.uz xabar berdi.
Shpaxingen shahrida yashovchi 51 yoshli ayol qo‘shnisining hovlisidagi bochkadan suv olib, o‘z idishlarini to‘ldirgani uchun politsiya tomonidan tergov qilinmoqda. Bu holat Pravilamag nashri tomonidan xabar qilindi.
Politsiyaning ma’lumotlariga ko‘ra, moddiy zarar katta bo‘lmasa-da, boshqa birovning mulkidan ruxsatsiz foydalanish o‘g‘irlik deb hisoblanadi. Politsiya bayonotida aytilishicha, yomg‘ir suvi osmondan yog‘ib tushgach, bochkaga tushganidan so‘ng uning egasiga tegishli hisoblanadi.
Tergov natijalariga ko‘ra, voqea soat to‘rtlarda sodir bo‘lgan. Ayol suv idishi bilan ikki marta ko‘chani kesib o‘tib, qo‘shnisining hovlisidan taxminan 40 litr suv olib ketgan.
Ikkinchi safar suv olayotganda esa u avtomobildan yashirinib, chiqindilar qutisi ortiga bekingan. Welt nashri yetkazilgan zarar miqdorini 15 sent deb baholagan.
Shunga qaramay, Germaniya qonunlariga ko‘ra, hatto arzimagan qiymatdagi buyumni o‘g‘irlash ham jiddiy jazoga sabab bo‘lishi mumkin. Bu jazolar orasida katta miqdorda jarima yoki besh yilgacha ozodlikdan mahrum qilish hukmi mavjud.
Shunday qilib, hatto kichik ko‘rinadigan harakatlar ham qonun oldida jiddiy oqibatlarga olib kelishi mumkinligi ta’kidlanmoqda.
