13 yoshli o‘smir ugra mahsulotidan vafot etdi
Misrning Qohira shahrida 13 yoshli o‘smir tez tayyorlanadigan ugra mahsulotini xom holda iste’mol qilib vafot etdi. Bu haqida Zamin.uz xabar berdi.
Hodisa Al-Marg tumanida yuz berdi. Bolaning jasadi hech qanday tashqi shikastlanishlarsiz topildi.
Dastlabki tergovga ko‘ra, u bir vaqtning o‘zida uchta o‘ram ugra mahsulotini xom holda iste’mol qilgan. Bu miqdor uning organizmiga katta yuk bo‘lib, qon aylanishi va oshqozon-ichak tizimida og‘ir muammolarni keltirib chiqargan.
Prokuratura ushbu mahsulotni sotgan do‘kon egasini qo‘lga olishga qaror qildi. Ugra namunalari laboratoriyada tekshiruvdan o‘tkazilmoqda, jasad esa sud tibbiy ekspertizasiga topshirildi.
Dastlabki natijalar mahsulot standartlarga mos kelishini ko‘rsatdi, ammo uni katta miqdorda xom iste’mol qilish xavfli ekanligi ta’kidlandi. “Indomiye” nomi bilan tanilgan tez tayyorlanadigan ugralar Misrda, ayniqsa yoshlar orasida keng tarqalgan.
Chunki ular arzon va tayyorlash oson. So‘nggi yillarda ushbu mahsulot bilan bog‘liq noxush holatlar bir necha bor qayd etildi.
Mutaxassislar natriy glutamat va konservantlar kabi tarkibiy qismlar uzoq muddat va ko‘p iste’mol qilinganda salomatlikka zarar yetkazishi mumkinligini bildiradi. Misr Milliy ovqatlanish instituti esa tez tayyor ugra mahsulotining bevosita o‘limga olib kelishi haqida ilmiy dalillar hozircha yo‘qligini ma’lum qildi.
Ekspertlarning fikricha, bunday fojialar ko‘proq mahsulotni noto‘g‘ri iste’mol qilish, haddan tashqari ko‘p miqdorda ovqatlanish yoki saqlash sharoitlarining buzilishi bilan bog‘liqdir. Mazkur voqea nafaqat mahalliy aholini, balki butun internet foydalanuvchilari va ijtimoiy tarmoqlar muxlislarini ham tashvishga soldi.
Ko‘pchilik bolaning oilasi va yaqinlariga hamdardlik bildirgan holda yoshlar uchun iste’mol miqdori va shartlari haqida ogohlantirishlarning yangilanishi zarurligini ta’kidlamoqda.
