Kecha, 20 avgust kuni Isroil armiyasi G‘azo shahriga keng ko‘lamli bostirib kirish operatsiyasini rasmiy ravishda boshlaganini ma’lum qildi. Bu haqida Zamin.uz xabar berdi.
Bu haqda “The Jerusalem Post” xabar berdi. Qaror G‘azo sektoridagi vaziyatning keskinlashuvi va ommaviy axborot vositalarida tarqalgan videolardan so‘ng qabul qilindi.
Isroil armiyasining rasmiy vakili, brigada generali Effi Defrin, armiya kuchlari allaqachon G‘azo shahrining chekka hududlarini nazorat qilib turganini bildirdi. Shuningdek, u bu hafta davomida Isroil fuqarolariga harbiy chaqiruv xabarnomalari yuborilayotganini, shu oy oxirigacha yana 20 mingta xat tarqatilishi rejalashtirilganini ma’lum qildi.
Defrinning ta’kidlashicha, Isroil armiyasi tinch aholi uchun xavfsiz evakuatsiya va gumanitar hamda tibbiy yordam ko‘rsatishni ta’minlashga alohida e’tibor qaratmoqda. Operatsiyaga “Gideon aravalari 2” nomi berilgan.
Oldingi xabarlarda HAMAS tomonidan garovdagilar haqidagi video tarqalganidan so‘ng Isroil butun G‘azo sektorini bosib olish masalasini ko‘rib chiqayotgani haqida ma’lumot berilgan edi. Videoda garovdagi erkaklardan biri oziq-ovqatsiz qolganini va hayot uchun kurashayotganini aytadi.
Isroil HAMASni garovdagilarni ozod qilmaslikda ayblasa ham, guruh bu da’volarni rad etib, garovdagilarga askarlar va ochlikdan aziyat chekkan fuqarolar bilan bir xil taom berilganini ta’kidlamoqda. BBC xabariga ko‘ra, Bosh vazir Binyamin Netanyaxu boshchiligidagi hukumat G‘azo sektorini to‘liq egallash va garovdagilarni harbiy yo‘l bilan ozod qilish rejalarini ko‘rib chiqmoqda.
Hukumat operatsiyaning boshlanish sanasini rasmiy e’lon qilmagan bo‘lsa-da, mahalliy matbuot armiyaning darhol shaharga kirishi kutilmasligini, avvalo tinch aholi xavfsiz evakuatsiya qilinishini ta’kidlamoqda. Shu bilan birga, Netanyaxu Isroilning boshqa yo‘li qolmaganini, maqsad HAMASni butunlay yo‘q qilish ekanini aytdi.
Shuning uchun G‘azo sektoridagi harbiy harakatlarni kengaytirish zarur deb hisoblanmoqda. Bu qaror mintaqadagi vaziyatni yanada murakkablashtirishi va xalqaro hamjamiyatning e’tiborini tortuvchi yangi bosqichga olib kelishi mumkin.
