Yaponiyada yorqin meteor osmonda paydo bo‘ldi
Yaponiyaning g‘arbiy hududida osmonda paydo bo‘lgan juda yorqin olov shari aholini hayratga soldi va yulduz kuzatuvchilarini hayajonga soldi. Bu haqida Zamin.uz xabar berdi.
Mutaxassislarning ta’kidlashicha, yuzlab kilometr uzoqlikdan ko‘rinadigan ushbu yorqin chaqnash favqulodda yorqin meteor tufayli yuzaga kelgan. NHK telekanali xodimi Yosixiko Hamahata Miyazaki prefekturasida mashinasida ketayotganda bu hodisaga guvoh bo‘lganini ma’lum qildi.
U yuqoridan tushayotgan oq nurni ko‘rib, uning shunchalik kuchli ekanligini aytdi-ki, atrofdagi uylar aniq ko‘rinib turgan. Bu holat go‘yo tong otgandek taassurot qoldirgan.
U birdaniga hayrat va sarosimaga tushganini bildirdi. Kosmik muzey rahbari Toshixisa Maeda ham bu hodisaning juda yorqin meteor bo‘lganini tasdiqladi.
U meteor Tinch okeaniga qulagan bo‘lishi mumkinligini aytdi. Shuningdek, odamlar havoda titrashlarni ham sezganini va meteor Oydek yorqin porlaganini ta’kidladi.
NASA ma’lumotiga ko‘ra, bunday hodisalarni yuzaga keltiruvchi jismlar odatda bir metrdan katta bo‘ladi. Atmosferada yorqin portlash hosil qiluvchi bunday jismlar ilmiy adabiyotda “bolid” deb ataladi.
Ushbu hodisa tabiatdagi noyob va qiziqarli ko‘rinishlardan biri sifatida qabul qilinadi.
