Mozori Sharifda Alisher Navoiy yodgorligi quriladi
Afg‘onistonning yirik shaharlaridan biri bo‘lgan Mozori Sharifda buyuk alloma Alisher Navoiy xotirasiga bag‘ishlangan yangi yodgorlik majmuasini qurish ishlari boshlandi. Bu haqida Zamin.uz xabar berdi.
Shahar markazida joylashgan, so‘nggi yillarda xarob holga kelgan yodgorlikni yangidan barpo etish uchun rasman tamal toshi qo‘yildi. Shahar hokimi Abdurahmon Himmatning so‘zlariga ko‘ra, bu qaror shaharning muhim chorrahalaridan biri — Muxobirot maydonida qabul qilingan.
Navoiy merosini munosib ulug‘lash maqsadida katta yer maydoni ajratilgan va zamonaviy majmua qurilishi rejalashtirilgan. Yangi majmuada Alisher Navoiyning hayot yo‘li, ijodi va davlat arbobi sifatida qilgan xizmatlari to‘rt tilda — o‘zbek, ingliz, doriy va pushtuda yoritiladi.
Bundan tashqari, maxsus kutubxona ham tashkil etiladi. Yodgorlik qurilishi shahar hokimligi budjetidan moliyalashtiriladi va bir oy ichida yakunlanishi ko‘zda tutilmoqda.
Matnlarni tayyorlashda Termiz davlat universiteti mutaxassislari ham yordam beradi. Oldinroq Mozori Sharifda Navoiy haykali va yodgorligi buzib tashlangani haqida xabarlar tarqalgan edi.
O‘zbekiston Tashqi ishlar vazirligi Afg‘oniston hukumatidan izoh so‘ragan. Keyinchalik «Tolibon» bu ishlar mahalliy hokimiyat tashabbusi bilan amalga oshirilgani va avvalgi yodgorlik joyining Navoiy xotirasiga munosib emasligi sababli olib tashlanganini ma’lum qildi.
Ular yangi va ko‘rkam majmua qurish rejasini qabul qilgan. Shu tariqa, Mozori Sharifda Alisher Navoiy nomini ulug‘laydigan, uning ma’naviy merosini kelajak avlodlarga yetkazadigan yangi yodgorlik barpo etilishida muhim qadam tashlandi.
