Janubiy Koreyada xorijliklarga mulk sotib olish cheklovi
Janubiy Koreyada 26 avgustdan boshlab chet elliklar uchun ko‘chmas mulk sotib olish bo‘yicha yangi qoidalar joriy etiladi. Bu haqida Zamin.uz xabar berdi.
Endilikda Seul shahri hamda poytaxtning ayrim tumanlarida uy-joy xaridi qat’iy cheklovlarga duch keladi. Xorijiy fuqarolar faqat mahalliy hokimiyatdan ruxsat olgan taqdirda va shaxsiy yashash maqsadida ko‘chmas mulkka egalik qilishlari mumkin.
Cheklovlar Seul shahri, Kyongido viloyatidagi 23 ta munitsipalitet (Yangju, Ichon, Ijongbu, Tonduchon, Yangpyon, Yoju, Gapyong va Yongchon bundan mustasno) hamda Inchon shahridagi yetti avtonom okrugda amal qiladi. Barcha xorijiy shaxslar, kompaniyalar va tashkilotlar ko‘chmas mulk sotib olishdan oldin rasmiy ruxsat olishlari shart.
Ruxsatsiz tuzilgan bitimlar qonuniy kuchga ega bo‘lmaydi. Yangi qoidalar kvartiralar, ko‘p qavatli uylar, taunxauslar va xususiy uylarni qamrab oladi.
Faqat biznes maqsadida foydalaniladigan ofis apartamentlari ushbu cheklovdan mustasno. Bundan tashqari, uy sotib olgan xorijliklar to‘rt oy ichida ko‘chib o‘tishi va kamida ikki yil davomida ushbu mulkda istiqomat qilishi lozim.
Uy ijaraga berilishi taqiqlanadi. Agar ko‘chmas mulk pullik tarzda sotib olinsa, ruxsat olish majburiy, bepul berilgan mulklar esa ushbu talabga kirmaydi.
Qoidalar buzilganda, mulk joylashgan hudud hokimiyati uch oy ichida qonuniy choralar ko‘radi. Bu talab bajarilmasa, har yili yer narxining o‘n foizigacha jarima solinishi mumkin.
Shu tariqa, Janubiy Koreyada xorijliklar uchun ko‘chmas mulk sotib olish tartiblari yanada qat’iy va diqqat bilan nazorat qilinadi.
