Yaponiya va Janubiy Koreya xavfsizlikda hamkorlikni kuchaytirdi
Yaponiya bosh vaziri Shigeru Ishiba va Janubiy Koreya prezidenti Li Chje Myon Tokioda uchrashib, xavfsizlik va iqtisodiy hamkorlikni mustahkamlash borasida kelishuvga erishdilar. Bu haqida Zamin.uz xabar berdi.
Bu uchrashuv Li Chje Myonning iyun oyida prezident etib saylangandan keyingi Yaponiyaga qilgan ilk tashrifi hisoblanadi. Tomonlar uch tomonlama kelishuv doirasida, AQSh bilan hamkorlikni yanada chuqurlashtirish, mudofaa, iqtisodiy xavfsizlik va sun’iy intellekt sohalarida qo‘shma loyihalarni rivojlantirishga kelishib oldilar.
Shu bilan birga, yoshlar almashinuv dasturlarini kengaytirish masalalari ham muhokama qilindi. Ikki davlat Shimoliy Koreyaning yadro va raketa tahdidlariga qarshi birgalikda harakat qilish zarurligini ta’kidladilar.
Avvalroq Yaponiyaga nisbatan tanqidiy fikrlar bildirgan Li Chje Myon Tokiodagi muzokaralarda munosabatlarni yaxshilash tarafdori ekanini bildirdi. Shuningdek, prezident Li 25-avgust kuni Vashingtonga tashrif buyurib, AQSh prezidenti bilan uchrashadi.
Uchrashuvda Xitoy va Shimoliy Koreya xavfsizlik masalalari hamda Janubiy Koreyada joylashgan AQSh qo‘shinlari uchun moliyaviy hissa muhokama qilinishi kutilmoqda. Bu uchrashuv mintaqaviy barqarorlikni ta’minlash va hamkorlikni mustahkamlashga xizmat qiladi.
