Emine Erdo‘g‘an Melaniya Trampga G‘azo bolalari haqida murojaat qildi
Turkiya birinchi xonimi Emine Erdo‘g‘an AQSh prezidenti Donald Trampning rafiqasi Melaniya Trampga murojaat qildi. Bu haqida Zamin.uz xabar berdi.
U Melaniyadan Isroil bosh vaziri bilan bog‘lanib, G‘azodagi bolalar ahvoli haqida gapirishni so‘radi. Emine Erdo‘g‘an o‘z xatida Melaniya Trampning yaqinda Rossiya va Ukraina bolalari haqida Vladimir Putinga yo‘llagan maktubidan ilhom olganini bildirgan.
Unga ko‘ra, shu kabi e’tibor G‘azo bolalari uchun ham zarurdir. Xatda Emine Erdo‘g‘an shunday dedi: “Siz 648 nafar ukrainalik bola haqida ko‘rsatgan e’tiboringiz G‘azoga ham tatbiq etilishiga ishonaman”.
Shuningdek, u Falastin masalasining dunyoda tobora ko‘proq e’tirof etilayotganini ta’kidladi. Hozirgi kunda xalqaro tashkilotlar G‘azoda ochlik darajasi juda yuqori ekanligini, rasmiy ravishda ocharchilik darajasiga yetganini bildirgan.
Mutaxassislar vaziyat yanada og‘irlashishi mumkinligini va bu Isroilga gumanitar yordamni ko‘proq kiritishga bosimni kuchaytirishini aytmoqda. Isroil bosh vaziri Benyamin Netanyaxu esa ushbu xabarlarni rad etdi va “Isroil ochlikni keltirib chiqarmaydi, aksincha uni oldini oladi” deb javob berdi.
G‘azodagi urush 2023-yil 7-oktabrda Hamas hujumidan keyin boshlangan bo‘lib, hozirga qadar 62 mingdan ortiq falastinlik halok bo‘lganligi ma’lum qilinmoqda.
