Tojikistonda folbinlik uchun jarimalar oshirildi
Tojikistonda folbinlik, sehrgarlik va jodugarlik xizmatlaridan foydalangan fuqarolar ma’muriy javobgarlikka tortiladi. Bu haqida Zamin.uz xabar berdi.
Mamlakat Ma’muriy javobgarlik to‘g‘risidagi kodeksining 482-moddasiga kiritilgan o‘zgartirishlarga ko‘ra, bunday xizmatlardan foydalanganlar 50 dan 60 baravar jarimaga tortiladi. Ushbu o‘zgarishlar 2025 yil 31 iyuldan kuchga kirgan bo‘lsa-da, rasmiy e’lon yaqinda berildi.
So‘nggi yillarda Tojikistonda folbinlar va sehrgarlarga qarshi chora-tadbirlar kuchaytirilmoqda. Masalan, 2024 yil yozida Ichki ishlar vazirligi folbinlik xizmatidan foydalangan fuqarolarni rasmiy idoralarga chaqirish va ularning ma’lumotlarini maxsus bazaga kiritishni yo‘lga qo‘ygan.
Rasmiylarning ta’kidlashicha, bunday choralar jamiyatda xurofot va sehrgarlikning tarqalishini oldini olishga qaratilgan. Shuningdek, 2024 yilda folbinlik va sehrgarlik bilan shug‘ullanish uchun jazo kuchaytirilib, jarima miqdori 80–100 baravargacha oshirildi hamda ma’muriy qamoq muddati 10 kundan 15 kungacha uzaytirildi.
Jinoyat kodeksining 240-moddasiga kiritilgan o‘zgartirishlarga ko‘ra, ma’muriy jazo olgan shaxs bir yil ichida qayta folbinlik qilsa, unga 1500–2000 baravar jarima yoki 1 yildan 2 yilgacha ozodlikdan mahrum qilish jazosi qo‘llanadi. Ichki ishlar vazirligi ma’lumotlariga ko‘ra, joriy yilning olti oyida mamlakatda 495 ta folbinlik va sehrgarlik holati aniqlandi.
Bu holatlar jamiyatda bunday noqonuniy faoliyatga qarshi kurashning dolzarbligini ko‘rsatadi. Shuning uchun, fuqarolarga folbinlik va sehrgarlik xizmatlaridan foydalanmaslik tavsiya etiladi.
